28-vjeçarja rrihet brutalisht nga burri dhe vjehrri i saj në Maliq

Një 28-vjeçare është rrahur brutalisht nga bashkëshorti i saj, në ambientet e shtëpisë e tyre në qytetin e Maliqit.

Sipas informacioneve të TvKlan.al, çifti kishte pasur një debat verbal dhe më pas bashkëshorti Emanuel Zyfi ka goditur me grushte bashkëshorten e tij, duke i shkaktuar dëmtime në fytyrë, transmeton Klankosova.tv.

Në konflikt, i cili dyshohet të jetë për motive xhelozie, është përfshirë edhe vjehrri i të resë, Trëndafil Zyfi, i cili gjithashtu bashkë me të birin ka ushtruar dhunë ndaj 28-vjeçares.

Fqinjët kanë dëgjuar të bërtiturat e së resë dhe kanë njoftuar policinë e Maliqit, e cila në pak minuta ka hyrë në banesë duke parandaluar përshkallëzimin e konfliktit, i cili mund të kishte pasur edhe pasoja më të rënda për të renë.

Policia ka arrestuar në flagrancë bashkëshortin 31-vjeçar Emanuel Zyfi, i skeduar nga policia si përdorues i lëndëve narkotike, dhe ka proceduar në gjendje të lirë babanë e tij Trëndafil Zyfi, ndërkohë që 28-vjeçarja u pajis me urdhër të menjëhershëm mbrojtje.