Përfundon aksioni i Prokurorisë në rajonin e Prishtinës, arrestohen pesë persona për mashtrim

Prokuroria Themelore në Prishtinë ka njoftuar se aksioni, i cili ka filluar në mëngjes të ditës së sotme, në koordinim me Policinë e Kosovës - Drejtoria Rajonale e Policisë së Prishtinës dhe me gjykatën kompetente, ka përfunduar.

Në kuadër të këtij aksioni janë kryer bastisje në pesë lokacione, përkatësisht në Prishtinë, Kamenicë dhe në Viti, ku fillimisht janë arrestuar pesë persona të dyshuar, prej tyre një zyrtar i Shërbimit Korrektues, ndërsa pas intervistimit të tyre në stacion policor, të njëjtët janë dërguar në mbajtje, në kohëzgjatje prej 48 orësh nga Prokurori i Shtetit, për shkak të veprës penale “Mashtrimi”, sipas KPRK-së.

“Personat me inicialet: B.Sh., B.H., V.C., B.B. dhe L.B., dyshohen se nga muaji janar-prill 2024, në bashkëkryerje, me qëllim të përfitimit të kundërligjshëm të dobisë pasurore për vete i kanë vënë në lajthim palët e dëmtuara, kinse do t’u shesin bitcoina, duke i nxitur kështu të veprojnë në dëm të pasurisë së tyre dhe me këto veprime kanë arritur të përfitojnë shuma të konsiderueshme të parave. Në këtë çështje penale janë në kërkim edhe dy (2) persona të tjerë të dyshuar, të cilët nuk janë gjetur në objektet përkatëse.

Nga bastisjet e realizuara janë sekuestruar fatura e prova të tjera, të cilat do të shërbejnë në procedurën penale”, thuhet në njoftim.

Prokuroria thotë gjithashtu se në koordinim me Policinë do të vazhdojë me ndërmarrjen e veprimeve hetimore lidhur me këtë rast. /Zëri