Drogë në formë çokollate dhe tunel i fshehtë, publikohen pamjet nga operacioni antikanabis në Shkodër
Publikohen pamjet nga operacioni antikanabis në Shkodër, ku janë sekuestruar 100 kilogramë drogë dhe dy persona janë shpallur në kërkim.
Nga pamjet e publikuara nga Policia shqiptare, shihen forcat policore duke ushtruar kontroll në zonë gjatë natës.
Në një breg godinave janë gjetur shkallë nëntokësore që të çojnë drejt një tuneli ku rezulton se ishin fshehur sasi të madha të lëndëve narkotike.
Po ashtu në një zonë pyjore shihet një tende ku brenda saj ka disa shtretër që dyshohet se kanë jetuar personat që janë marrë me kultivimin e lëndëve narkotike.
Në momentin e ndërhyrjes nuk janë konstatuar personat e dyshuar por nga hetimet paraprake është bërë shpallja në kërkim e dy shtetasve si autorë të dyshuar të këtij rasti dhe konkretisht shtetasit 42 vjeç dhe 37 vjeç, lindur në fshatin “Ura e Shtrenjtë” dhe banues në Shkodër, për të cilët vijon puna për kapjen e tyre.
Njoftimi i plotë i Policisë shqiptare, pa ndërhyrje:
Shkodër
Ja pamjet e megaoperacionit kombëtar anticannabis të koduar "Territor i pastër", si rezultat i të cilit, gjatë një jave, në territorin e qarkut Shkodër, u asgjësuan 19 000 fidanë cannabis dhe u sekuestruan 2 000 fara kanabis. Ndërsa gjatë megaoperacionit kombëtar “Tempulli 2”, të zhvilluar mbrëmjen e djeshme, u sekuestruan 97 kilogramë cannabis, në formë çokollate dhe boçeje.
