Themelorja jep detaje, dyshohet për zjarrvënie të qëllimshme në objektin e Gjykatës në Kaçanik
Gjykata Themelore në Ferizaj është deklaruar në lidhje me zjarrin që ka kapluar objektin e Degës së kësaj gjykate në Kaçanik, rreth orës 4:00 të mëngjesit të së mërkurës.
Sipas njoftimit, nga zjarri janë përfshirë dy zyra që ndodhen në katin II të këtij objekti.
“Ju informojmë se sot, më 13 mars 2024, rreth orës 4:00, të mëngjesit, zjarri ka kapluar një pjesë e dy zyrave të katit II të objektit të Gjykatës Themelore në Ferizaj – Dega në Kaçanik”, thuhet në komunikatën për media.
Tutje, bëhet e ditur se ekipi i zjarrfikësve dhe policia kanë dalë menjëherë në vendin e ngjarjes dhe kanë lokalizuar zjarrin.
“Janë ndërmarrë masat e nevojshme dhe zjarri është shuar, si dhe kanë zhvilluar procedurat dhe marrjen e provave. Si pasojë e zjarrit ka pasur dëme materiale, por jo pasoja me njerëz.
Sipas të dhënave të organeve kompetente, dyshohet për zjarrvënie nga persona të panjohur deri më tani.