Vritet një grua në Prishtinë
Një grua është vrarë sot në Prishtinë.
Ngjarja ka ndodhur rreth orës 20:20, kur Policia ka pranuar informatën për të shtëna me armë në rrugën "Dalip Alshiqi" në Prishtinë.
Vrasja ka ndodhur në një veturë, ndërsa rastin e kanë konfirmuar për “Zërin” edhe nga Policia e Kosovës.
“Policia si dhe mjekët emergjent, menjëherë kanë dalë në vendin e ngjarjes, ku në një veturë kanë hasë një person pa shenja jete. Vdekjen e viktimës (femër) e ka konstatuar ekipi mjekësor në vendin e ngjarjes”, ka konfirmuar për “Zërin” zëdhënësi i Policisë për rajonin e Prishtinës, Agron Borovci.
Borovci tha se mbështetur në informacionet e para, dyshohet se bëhet fjalë për vrasje me armë zjarri.
“Policia në koordinim me prokurorinë, ka nisur hetim dhe ndërmarrjen e të gjitha veprimeve hetimore dhe të ekzaminimit, që do të ndihmonin hetimin e ngjarjes si dhe sqarimin e plotë të rastit”, tha ai. /Zëri
