Shtyhet gjykimi për vrasjen e ndodhur në vitin 2022 në Baks të Skenderajt

Për shkak se mbrojtësi i të akuzuarit Fiton Musliu, avokati Gani Rexha mungoi pa arsye, ka dështuar seanca e së martës në Gjykatën Themelore në Mitrovicë, në rastin ku Musliu bashkë me Shukri dhe Rexhep Rexhepin akuzohen për vrasjen e B.M., në vitin 2022, në Baks të Skenderajt.

Në këtë rast, Shukri dhe Rexhep Rexhepi ngarkohen me veprën penale “Vrasje e rëndë” dhe armëmbajtje pa leje, kurse Fiton Musliu për veprën penale “Vrasje në tentativë” dhe armëmbajtje pa leje, raporton “Betimi për Drejtësi”.

Lidhur me mungesën e avokatit Rexha, i mbrojturi i tij Fiton Musliu tha se 20 minuta para se të fillojë seanca, avokati i kishte thënë përmes telefonit se nuk mund të jetë i pranishëm në seancë, pa i dhënë ndonjë arsye.

Andaj, në mungesë të kushteve ligjore për mbajtjen e shqyrtimit gjyqësor, meqenëse vepra penale për të cilën akuzohet Musliu kërkon mbrojtje të obligueshme, seanca e sotme u shty ndërsa e radhës u caktua më 24 nëntor 2023.

Gjykata ia rikujtoi të akuzuarit Musliu se në shqyrtimin e ardhshëm gjyqësor duhet të paraqitet me mbrojtësin e tij ose të njoftojë gjykatën për caktimin e ndonjë mbrojtësi sipas detyrës zyrtare.

Paraprakisht, gjyqtari i rastit Mentor Hajraj i tha prokurores Fetije Bajrami se në aktakuzë nuk ishte propozuar që të ftohet ndokush për të përfaqësuar në emër të familjes së viktimës. Kurse, prokurorja Bajrami tha se në aktakuzë është bërë një lëshim dhe tani i propozoi Gjykatës që në shqyrtimin e ardhshëm gjyqësor të ftohet edhe përfaqësuesi i familjes së të ndjerit B.M.

Ndryshe, i akuzuar në këtë rast ka qenë edhe Agim Musliu, ndaj të cilit ishte veçuar procedura pas pranimit të fajësisë për armëmbajtje pa leje.

Ndryshe, Prokuroria Themelore në Mitrovicë më 19 qershor 2023 ka ngritur aktakuzë kundër Shukri Rexhepit, Rexhep Rexhepit, Fiton Musliut dhe Agim Musliut.

Shukri dhe Rexhep Rexhepi akuzohen se më 23 korrik 2022, në fshatin Baks, komuna Skenderaj, në bashkëkryerje, kanë privuar nga jeta viktimën B.M., si dhe kanë plagosur të dëmtuarin Labinot Ademi. Rasti thuhet se ka ndodhur pas një fjalosjeje. Kurse Fiton Musliu akuzohet se me dashje ka filluar kryerjen e veprës penale të vrasjes mirëpo që e njëjta ka mbetur në tentativë, pasi i njëjti ka shkrepur me pushkë të gjuetisë me qëllim që ta privojë nga jeta Shukri Rexhepin. Kurse, Agim Musliu thuhet se ka mbajtur në posedim armë të zjarrit - pushkë e gjuetisë në kundërshtim me Ligjin për armë.