Sekuestrimi i armëve në veri, videoja që publikoi “Brigada e Veriut” një ditë më herët
Instituti për studimin e kërcënimeve hibride “Octopus” njofton se Brigada e Veriut, organizatë kjo e shpallur terroriste nga Qeveria e Kosovës, ka postuar një video mbrëmë, ku shihet një armë, prodhim i ri serb, ndërsa pikërisht sot, Policia e Kosovës ka sekuestruar armë në veri.
Instituti “Octopus” thotë se kjo organizatë vazhdon të paraqes rrezik të vazhdueshëm, ndërsa organizimi vjen nga presidenti i Serbisë, transmeton Telegrafi.
“Brigada e Veriut, organizata e shpallur terroriste nga Qeveria e Kosovës, ka postuar një video para 18 orësh. Në video, shihet një armë AK-47 prodhim serb i ri, e shoqëruar nga këngë çetnike. Sot, autoritetet e Kosovës kanë sekuestruar armë, municione dhe bomba, duke treguar se kjo organizatë vazhdon të paraqesë një rrezik të vazhdueshëm. Gjithmonë, organizimi i tillë vjen nga vet Vuçiqi i cili ka në shërbimin e tij kriminelet si Radojiçiqi dhe Veselinoviqi. Instituti ‘Octopus’ ka raportuar vazhdimisht për aktivitetet e grupeve kriminale serbe në veri te Kosovës”, thuhet në njoftim.
Ndryshe, një asi e madhe e armatimit është zbuluar të martën në një shtëpi në Zveçan, duke përfshirë armë automatike, fishekë, granata dore dhe eksploziv.
Drejtori i Policisë së Kosovës për rajonin e veriut, Veton Elshani, tha para gazetarëve se policia ka arritur të gjejë katër pushkë automatike, karikatorë, eksploziv, granata dore. municion dhe gjëra të tjera.
“Policia e Kosovës pas pranimit të një informate nga Agjencia Kosovare e Inteligjencës, ka zhvilluar një bastisje në Korilë e Poshtme këtu në Zveçan, me ç’rast gjatë bastisjes kemi hasur në armë dhe municion të cilin ju e patë. Aty janë gjetur katër pushkë automatike, karikatorë, eksploziv, granata dore, municion dhe gjëra të tjera. Policia e Kosovës vazhdon të jetë e dedikuar për ruajtjen e rendit dhe të qetësisë publike në mbarë territorin e Kosovës dhe në veçanti në veriun e saj… Duke marrë parasysh numrin, sasinë dhe llojin e armëve, atëherë del se ky vend ka mundësi të jetë edhe depo. Ne nuk kemi të arrestuar për momentin, por kemi persona të dyshimtë. Në mesin e armëve dhe municionit që ju i patë kishte edhe kallashnikov dhe municion 5X56, që i bie kalibër i NATO-s, e që është një rast interesant për t’u hetuar… Në pjesën veriore të Kosovës situate është e qetë, stabile, por delikate, duke marrë parasysh edhe zhvillimet politike, të cilat po zhvillohen në vend”, ka thënë Elshani.
