Arrestohet një 15-vjeçar në Shtime, theri me thikë një 21-vjeçar

Mbrëmë rreth orës 19:00 policia në Shtime ka pranuar një informacion se në rrugën “Tahir Sinani” në Shtime është një rast i lëndimit trupor.

Në lidhje me këtë Policia menjëherë ka dalë në vendin e ngjarjes, ku më pas është informuar se një 21-vjeçar kishte pësuar lëndime të rënda trupore nga një person, i cili kishte ikur nga vendi i ngjarjes, transmeton Zeri.info.

“Nga informatat e para është mësuar se S.G. (M/K), 21-vjeçar, ka pësuar lëndime të rënda trupore. Dyshohet se lëndimet i janë shkaktuar nga një person tjetër me një mjet të mprehtë, i cili më pas ka ikur nga vendi i ngjarjes.

Për ndihmë mjekësore, fillimisht viktima është dërguar në Qendrën Emergjente në Shtime, e më pas për tretman të mëtutjeshëm mjekësor është dërguar në Qendrën Klinike Universitare në Prishtinë. Në vendin ngjarjes kanë dalë edhe njësia e hetimeve të stacionit, e cila nën autorizim të prokurorit kujdestar kishte nisur hetimet”, thuhet në njoftim.

Policia ka njoftuar se pas hetimeve ka arritur të arrestojë të dyshuarin, 15-vjeçar dhe i njëjti është dërguar në mbajtje për 24 orë.

Pas një pune intensive hetimore të policëve hetues, grumbullimit të informacioneve në terren , hetuesit kanë arritur që të identifikojnë të dyshuarin dhe vendin e ndodhjes së tij, të cilin më pas e kanë arrestuar. I dyshuari A.A. ( M/K) i moshës 15-vjeçar është shoqëruar në Stacionin e Policisë në Shtime dhe pas intervistimit nga policët hetues, në prezencë edhe të avokatit mbrojtës me detyrë zyrtare dhe prindit të tij, me vendim të prokurorit të rastit nga Prokuroria Themelore në Ferizaj, i njëjti është dërguar në mbajtje për 24 orë, për procedura të mëtejme hetimore, ndërsa rasti është cilësuar “Lëndim i rëndë trupor”, thuhet në njoftim. /Zëri