Aksion i Policisë në Pejë, Gjakovë e Mitrovicë, arrestohen 7 persona dhe konfiskohen mbi 68 kg marihuanë

Zyrtarë policorë të Drejtorisë për Hetimin e Trafikimit me Narkotik në Pejë, Gjakovë e Mitrovicë, të përkrahura nga njësi tjera policore sot, pas hetimeve disamujore dhe pas pranimit të urdhëresës së gjykatës, kanë realizuar kontrolle në dhjetë lokacione nën dyshime për kultivim dhe trafikim me lëndë narkotike.

Policia ka njoftuar se në këtë aksion janë arrestuar shtatë persona, transmeton Zeri.info.

“Gjatë realizimit të operacionit policor në cilësi të të dyshuarve janë arrestuar: G.J., (viti i lindjes 1985, mashkull shtetas i Shqipërisë), E.M., (viti i lindjes 2000, mashkull kosovar), Z.M., (viti i lindjes 1988, mashkull kosovar), E.J., (viti i lindjes 2000, mashkull kosovar), F.D., (viti i lindjes 1976, mashkull kosovar), F.Gj., (viti i lindjes 1973, mashkull kosovar) dhe A.J., (viti i lindjes 1970, mashkull kosovar)”, thuhet në njoftim.

Po ashtu, janë konfiskuar mbi 68 kg marihuanë.

“Policia ka konfiskuar si provë materiale që do të përdorët në procedurë të mëtejme: substancë narkotike 68 kg e 49 gr, dyshohet të jetë marihuanë, që ka qenë në proces të tharjes, 177 bimë narkotike të llojit kanabis-sativa, 421 gr. substancë narkotike, dyshohet e llojit kokainë, dy armë zjarri, para të gatshme e dëshmi tjera”, thuhet në njoftim.

Bëhet e ditur se të dyshuarit janë intervistuar në prani të avokatëve mbrojtës dhe pas intervistimit në konsultim me prokurorin u është shqiptuar masa e ndalimit prej 48 orësh./Zëri