Nuk iu përfillën kërkesat për rroga, punëtorët e KEK-ut paralajmërojnë protestë

Sindikata e Re e Punëtorëve të Korporatës Energjetike të Kosovës ka paralajmëruar mbajtjen e një proteste për javën e ardhshme.

Kryetari i kësaj sindikate Nexhat Llumnica ka konfirmuar për Klan Kosova se ata do të kërkojnë rritje të pagave, si dhe pagën e 13-të.

Ai, mes të tjerash, ka theksuar se nëse nuk iu merren parasysh kërkesat, do të mbajnë edhe grevë.

“E nëse edhe kjo e radhës nuk përfillet nga KEK-u, do të ndërmarrim masa ligjore dhe do të vazhdojmë drejt grevës”, shtoi Llumnica.

Protestë për kërkesa të njëjta ata zhvilluan edhe rreth një javë më parë.

Ditë më parë, KEK-u pas një takimi të mbajtur me përfaqësues të sindikatave, sa i përket kërkesës për pagën e 13-të dhe rritjen e pagave, u sqarua se gjatë këtij viti KEK-u ka zbatuar projektin e modernizimit të turbinave, një proces që ka zgjatur rreth 5 muaj.

Si rezultat, ky projekt ka ndikuar drejtpërdrejt në të hyrat e Korporatës.

“Për rrjedhojë, gjendja aktuale financiare dhe korniza ligjore nuk e mundësojnë aprovimin e kësaj kërkese, pavarësisht gatishmërisë sonë për ta shqyrtuar atë me seriozitet”, është thënë mes të tjerash në njoftim.

“Gjatë takimit, nga përfaqësuesit sindikal është kërkuar që punonjësit të njoftohen në mënyrë më të detajuar lidhur me situatën reale financiare dhe operative të korporatës. Në këtë drejtim, u theksua se, përveç sigurimit shëndetësor dhe shujtës së dinjitetshme, së shpejti do të përfundojë edhe procesi i vlerësimit të rrezikshmërisë në punë — një proces me kosto të konsiderueshme, nga i cili do të përfitojnë të gjithë punonjësit sipas vlerësimit të vendit të punës”.