Shënohet Java e Biznesit Kosovar, thuhet se Kosova mbetet e varur nga importet
Në Javën e Biznesit Kosovar është thënë se mosfunksionimi i institucioneve të Kosovës ka bërë që Kosova të jetë në gjendjen më të rëndë që nga paslufta, duke u theksuar se Kosovës po mbetet e varur nga importet.
Kryetari i Aleancës Kosovare të Biznesit (AKB), Agim Shahini ka u ka bërë thirrje partive politike që të tregohen të përgjegjshme para votueseve, qytetarëve dhe bizneseve, për çka tha se Kosova nuk ka strategji të avancuar për ndihmuar prodhuesit vendorë.
“Shënojna javën e biznesit kosovar, projekt ky i filluar nga 2003, me të vetmin qëllim dhe mision që të ngritët vetëdija kombëtare e gjithë konsumatorëve ane e mbanë për të konsumuar prodhime vendor 'Made in Kosova'. Atëherë kur patëm filluar kishte pak prodhues dhe prodhime në vend, por sot tavolinat tona dhe anembanë Kosovës ka çka të konsumojnë prodhime vendore. Çka na duhet neve është që të kërkojmë nga prodhuesit të kenë sasi të mjaftueshme dhe të kenë çmime konkurruese. Biznese e Kosovës viteve kanë shënuar rënie në disa raste dhe goditja më e madhe ishte kur energjia elektrike në Kosovë u shtrenjtua saqë shumë prodhues u detyruan të riorganizojnë prodhimin, punësimin e disa për fat të keq janë mbyllur e disa janë bartur jashtë Kosovës. Kosova nuk ka strategji për të avancuar dhe ndihmuar prodhuesit vendor. Mbi 7 miliardë euro këtë vit kemi importuar mallra nga vendet e ndryshme dhe eksporti ynë është tepër i vogël në krahasim me importet. Konsumatorët kosovarë janë duke treguar për çdo ditë më shumë besnik prodhimeve vendore por për fat të keq edhe të huajve. Na duhet ngritje e nacionalizmit shpirtëror ekonomik, për të konsumuar sa më shumë prodhime shqiptare por mbi të gjitha na nevojitet strategjia kombëtare për zhvillim ekonomik që ka tentuar disa herë të bëhet por ka dështuar”, tha ai.
Nënkryetari i AKB-së, njëherësh edhe pronari i UNI Universum, ka thënë se Qeveria nuk po e sheh biznesin si partner.
“Si rezultat i kësaj mbështetjes së AKB –për 23 vite kemi arritur në një situatë kur derisa në fillim të vitit 2023, prodhimi vendor ka pasë një pjesëmarrje 5 për qind… tash kemi një situatë ku prodhuesit vendor kanë pësuar rritje të dukshme, por ajo që është më rëndësi se kanë pësu avancim në dy segmente, atë të teknologjive të reja dhe prodhuesi vendor tash është pjesë e tregut global dhe kemi një numër të madh të prodhuesve vendor që eksportojnë pothuajse në të gjitha tregjet e Evropës. Kohët e fundit komuniteti i biznesit, prodhuesit vendor nuk shihen nga qeveria me syrin e një partneri apo bashkëpunoi për vet faktin se nuk kemi pasë një takim të përbashkët mes qeverisë dhe komunitetit të bizneseve siç ka qenë një traditë ndoshta 20 vjeçare. Ka pesë vjet që bizneset nuk kanë kurrfarë komunikimi me Qeverinë. Në vend se qeveria t’i qaset me reforma liberale, e shoh tendencën që ekonominë e shohin si një përfitues”, tha ai. /EO
