Azemi pas takimit me Muratin: U pajtuam që paga minimale nga janari të jetë 500 euro

Kryetari i Sindikatës së Punëtorëve të Sektorit Privat, Jusuf Azemi, pas takimit me ministrin në detyrë të Financave, Hekuran Murati, ka thënë se janë pajtuar që paga minimale të jetë 500 euro, siç ata planifikojnë.

Azemi tha se nëse gjithçka shkon mirë, atëherë kjo pagë do të fillojë së implementuari në janar të vitit që vjen.

“Në takimin e sotëm është diskutuar për pagën minimale. Normal që ne si udhëheqësi të sindikatës së punëtorëve të jetë pagë minimale 600 euro. Unë e kam pa pëlqimin e njerëzve kompetentë, qeverisë në detyrë që vlerësimi i tyre të jetë 500 euro. E kam pyetur decidivisht se nëse gjithçka shkon mirë kur mendoni të fillojë së implementuari. Sipas deklarimit të ministrit në detyrë është që se paga prej 500 eurove do të fillojë së implementuari në janar. Por megjithatë nuk ka hedhur poshtë edhe propozimin tonë, ku është thënë se do të bisedojë me akterët kryesorë. Megjithatë me gjitha akterët që ishin jemi pajtuar që paga minimale të jetë 500 euro dhe të fillojë implementimi në janar”, tha Azemi.

Azemi ka shpalosur edhe deklaratën e Muratit për atë se pagën minimale e përcakton edhe Këshilli Ekonomiko-Social, pa çka ai citohet të ketë thënë se i ka kompetencat për të vendosur.

“Ka qenë një shpjegim i ministrit për shkak se pagën minimale e përcakton Këshilli Ekonomiko-Social në mungesë të saj, ai thotë se i ka kompetencat të vendosë për ta derisa që në këtë këshill janë edhe disa sindikata tjera. Po flas sipas ministrit, nuk i plotësojnë kushtet sindikatat tjera dhe për atë arsye nuk janë thirrur”, ka deklaruar Azemi.

Ndërsa Kushtrim Ahmeti nga Dhomat e Tregtisë ka thënë se takimi me Muratin ishte konsultativ e ku thotë të kenë kërkuar që ky proces të shtyhet deri të bëhet një qeveri e plotë dhe një Kuvend funksional.

“Nuk jemi kundër rritjes së pagës, por për momentin situata politike me të cilën po përballet vendi nuk është e favorshme. Ne i kërkuam ministrit Hekuran Murati që ky proces të shtyhet derisa të ketë një Qeveri fuqiplotë dhe një Kuvend funksional. Dhe të kemi një analizë të thuktë të situatës aktuale ekonomike të cilën e ka vendi. D.m.th., duke marrë të gjithë faktorët para se të dilet me propozime. Kërkesa eksplicitet ishte që duhet të funksionalizohet Këshilli Ekonomiko-Social i cili vazhdon të mos jetë funksional të shkojë ky proces i vendosjes së pagës minimale përmes Këshillit Ekonomik-Social siç është bërë përherë, përjashto herën e fundit, ku ne nuk jemi pyetur fare. Ne kërkuam që ky proces të ketë një përfaqësim më të gjerë. /EO