“Një takim shpirtrash”, Kosova me forum ekonomik “Doing Business with Finland”

Oda Ekonomike e Kosovës ka organizuar forumin ekonomik “Doing Business with Finland”, ku është nënshkruar edhe marrëveshja e bashkëpunimit me “Finland Partnership’, një mekanizëm që do të mundësojë dhe inkurajojë bashkëpunimin ekonomik me mbështetje konkrete.

Ambasadorja e Finlandës në Kosovë, Eevamari Laaksonen, ka theksuar se Kosova dhe Finlanda ndajnë të njëjtat vlera, duke theksuar se partneriteti ekonomik ndërtohet mbi inovacion, transparencë dhe zhvillim të qëndrueshëm.

“Finlanda dhe Kosova ndajnë shumicën e vlerave tona — madje do të thosha, pothuajse të gjitha. Si diplomate, është e rrallë që ta them këtë kaq hapur, por jam shumë e lumtur të theksoj se edhe në fushën e biznesit, vlerat tona janë të njëjta: inovacioni, transparenca dhe përqendrimi në rritje të qëndrueshme afatgjatë”, tha Laaksoneni, raporton Ekonomia Online.

Ajo shtoi se në Finlandë suksesi matet me përgjegjësi dhe respekt për njerëzit dhe mjedisin, duke vlerësuar se këto parime po reflektohen edhe në ekonominë kosovare.

“Në Finlandë shpesh themi se suksesi yt nuk matet me atë që prodhon, por me mënyrën se si e bën atë — me përgjegjësi, besim dhe respekt për njerëzit dhe mjedisin. Dhe këtu në Kosovë, këto vlera reflektohen në një ekonomi të re, dinamike dhe afatgjatë, e cila po rritet me shpejtësi. Sektorët kyç si teknologjia e informacionit (ICT), energjia e rinovueshme, industria minerare dhe prodhimi po përparojnë me ritme të shpejta falë sipërmarrësve të talentuar”, theksoi ajo.

Ambasadorja finlandeze e quajti forumin “një takim shpirtrash”, ku takohen ekspertiza dhe energjia e dy vendeve.

“Prandaj, besoj se ky seminar që po zhvillojmë sot nuk është thjesht një takim. Ai është një takim shpirtrash — aty ku ekspertiza finlandeze në inovacion dhe qëndrueshmëri takon energjinë, kreativitetin dhe ambicien e Kosovës. Jam e bindur për këtë”, u shpreh Laaksoneni.

Kryetari i Odës Ekonomike të Kosovës, Lulzim Rafuna, tha se Kosova ofron mundësi të mëdha për partneritet strategjik me Finlandën, veçanërisht në sektorin e teknologjisë dhe industrisë minerare.

“Ne vazhdojmë të bashkëpunojmë edhe më ngushtë me ambasadën finlandeze, dhe ja ku jemi sot, në një ngjarje me përkushtim të veçantë për thellimin e këtij bashkëpunimi. Kosova ofron një mundësi të shumëfishtë për bashkëpunim të mençur. Mund të gjejmë potencial të jashtëzakonshëm për partneritet strategjik, veçanërisht në dy sektorë: në teknologjinë e informacionit dhe në industrinë minerare. Por ky është vetëm fillimi. Me themelin e shkëlqyer që kemi vendosur sot, jemi praktikisht të detyruar të punojmë edhe më shumë. Dhe kjo është një lajm i shkëlqyer”, tha Rafuna.

Ai njoftoi se Oda Ekonomike e Kosovës po planifikon organizimin e një misioni biznesi në Finlandë për të zgjeruar mundësitë për bizneset kosovare.

“Me rritjen e besimit dhe suksesit që po shohim, pa dyshim do të planifikojmë hapin e ardhshëm – organizimin e një misioni biznesi në Finlandë dhe identifikimin e mundësive të tjera për bizneset kosovare atje. Të dashur biznesmenë nga Finlanda, sinqerisht shpresoj që do të gjeni partnerë të vërtetë në Kosovë, dhe që do të ktheheni vazhdimisht për produkte dhe shërbime. Pse jo, edhe për investime të përbashkëta që do të sjellin përfitime për të dyja vendet tona. Oda Ekonomike e Kosovës është këtu për ju, e gatshme t’ju mbështesë dhe t’ju ndihmojë në çdo hap të bashkëpunimit tuaj biznesor”, theksoi ai.

Rafuna shtoi se nënshkrimi i marrëveshjes me “Finland Partnership” do të hapë rrugën për projekte konkrete ekonomike mes dy vendeve.

“Sot do të kemi edhe një moment tjetër të rëndësishëm – nënshkrimin e një marrëveshjeje me ‘Finland Partnership’, një mekanizëm që do të mundësojë dhe inkurajojë këtë bashkëpunim me mbështetje konkrete”, deklaroi ai.

Boguslaw Gertruda, kryetar i Seksionit Politik, Ekonomik dhe të Integrimit Evropian nga Zyra e BE-së në Kosovë, i cili theksoi mbështetjen e vazhdueshme të Bashkimit Evropian për Kosovën në zhvillimin ekonomik dhe integrimin tregtar.

“Që nga viti 2024, qytetarët e Kosovës gëzojnë udhëtim pa viza për qëndrime afatshkurtra në Bashkimin Evropian. Në kuadër të instrumenteve të saj financiare, Bashkimi Evropian ka investuar më shumë se 1.5 miliard euro midis viteve 2007 dhe 2020 në rindërtim, administratë publike, sundim të ligjit, reforma të qëndrueshme ekonomike dhe fusha të tjera”, tha Gertruda.

Ai shtoi se marrëdhëniet ekonomike mes BE-së dhe Kosovës janë forcuar ndjeshëm, me rritje të dukshme të eksporteve dhe investimeve.

“Bashkëpunimi ynë është përkthyer në një marrëdhënie të fortë tregtare dhe investuese. Vetëm në vitin 2024, eksportet e Kosovës drejt BE-së u rritën me rreth 9% dhe përbënin rreth 33% të eksporteve të përgjithshme të Kosovës, ndërsa importet nga BE-ja u rritën me rreth 12% dhe përfaqësonin rreth 45% të importeve totale të Kosovës,” tha ai.“Bashkimi Evropian është gjithashtu investitori më i madh i huaj në Kosovë. Pjesëmarrja e kompanive nga Bashkimi Evropian në totalin e investimeve të huaja direkte në Kosovë është mbi 60%”, përfundoi Gertruda.