Tri platformat që po zhvatin shqiptarët, AKSK: Kujdes nga skemat mashtruese të investimeve online
Autoriteti Kombëtar për Sigurinë Kibernetike e Shqipërisë në ushtrim të kompetencave të tij për garantimin e sigurisë në hapësirën digjitale dhe ndërgjegjësimin e publikut për rreziqet kibernetike, informon qytetarët mbi identifikimin e një rasti mashtrimi online përmes një platforme të vetëquajtur TXEX.
Në njoftim thuhet se kjo platformë, e prezantuar si aplikacion për investime në kriptovaluta, nuk është e regjistruar dhe nuk është e licencuar në Republikën e Shqipërisë dhe si e tillë operon jashtë çdo kuadri ligjor kombëtar.
“Nga vëzhgimet tona dhe nga denoncimet e shumta të bëra publike, konstatohet se aktiviteti i saj mbart tiparet e qarta të një skeme mashtruese digjitale”, thuhet në njoftim.
Mënyrat e funksionimit të mashtrimit
Platforma TXEX përdor:
Reklama joshëse dhe të rreme në rrjete sociale (p.sh. Instagram, TikTok);
Krijimin e grupeve të simuluara komunikimi në Telegram, WhatsApp, Signal;
Prezantimin e fitimeve të fabrikuara për të ndërtuar besueshmëri tek viktimat;
Kërkimin e pagesave shtesë me arsyetimin për “verifikim” apo “tërheqje fondesh”;
Mbledhjen e dokumenteve personale sensitive (ID, foto), duke shtuar rrezikun për keqpërdorim të të dhënave personale.
AKSK-ja paralajmëron qytetarët shqiptarë se përfshirja në këtë platformë sjell:
Humbje financiare të parikuperueshme;
Rrezik të lartë për cenimin e privatësisë dhe identitetit digjital;
Mundësi për keqpërdorim të mëtejshëm të të dhënave personale nga rrjete kriminale.
Qytetarët duhet të kenë parasysh se:
Asnjë subjekt i palicencuar nuk ka të drejtë të ofrojë shërbime financiare apo investimi në Shqipëri;
Premtimet për fitime të shpejta dhe të garantuara janë indikator klasik i mashtrimeve online;
Asnjë platformë e ligjshme nuk kërkon pagesa shtesë apo të dhëna personale për tërheqjen e fondeve.
Për të mbrojtur veten dhe të tjerët, AKSK-ja u bën thirrje qytetarëve që:
Të mos kryejnë transaksione financiare me këtë platformë;
Të mos ndajnë të dhëna personale sensitive me subjekte të panjohura;
Të raportojnë menjëherë rastet e dyshimta.
Në njoftim tutje thuhet se përveç TXEX janë dhe 2 platforma të tjera të ngjashme XUEXA dhe Grokrexduu.
AKSK ka marrë masa urgjente për bllokimin e aktivitetit të këtyre faqeve mashtruese në territorin e Republikës së Shqipërisë, duke bashkëpunuar ngushtësisht me institucionet përgjegjëse AKEP, Policinë e Shtetit dhe ofruesit e shërbimeve të internetit.
Autoriteti Kombëtar për Sigurinë Kibernetike thekson se siguria kibernetike është pjesë përbërëse e sigurisë kombëtare, dhe se mbrojtja nga mashtrimet digjitale kërkon kujdes të shtuar, ndërgjegjësim të vazhdueshëm dhe bashkëpunim të qytetarëve me institucionet përgjegjëse.
