Peci në Mamushë: Rritja e eksporteve të lakrave dëshmon mbështetjen e qeverisë për fermerët

Ministri i Bujqësisë, Faton Peci ka qëndruar sot për vizitë në Mamushë, ku ka vizituar Erbin Mazrekun i cili ka përfituar grant për ndërtimin e serrës prej 21 ari.

Peci në një postim në Facebook ka shkruar se rritja e prodhimit dhe eksportit bujqësor dëshmon mbështetjen e qeverisë për fermerët.

“ Këtë e vërteton edhe Erbin Mazreku nga Mamusha, të cilin e vizitova sot. Ai është përfitues i grantit për ndërtimin e serrës 21 ari, ku kultivon 60 mijë fidanë lakre “Protor” dhe punon 10 hektarë të tjerë me patate e kultura të tjera. Në total, ai ka 1 hektar e 18 ari sera”, ka shkruar Peci.

Ministri ka theksuar se rezultatet flasin vetë.

“Në vitin 2019, eksporti i lakrave nga Kosova ishte 122,539 €, ndërsa në vitin 2024 ka arritur në 991,397 €. Ky sukses tregon se investimi në bujqësi është çelësi për një ekonomi të qëndrueshme dhe një të ardhme më të begatë për Kosovën”, ka shkruar Peci.