Komuna e Prishtinës po dështon të miratojë buxhetin për vitin 2025, LVV-ja thotë se është përgjegjësi e partisë në pushtet t’i sigurojë numrat

Komuna e Prishtinës ka dështuar të miratojë buxhetin për vitin 2025, pasi në seancat që janë mbajtur deri tani nuk ka pasur kuorum të mjaftueshëm për të votuar buxhetin. Buxheti i propozuar për vitin 2025 arrin vlerën prej 128 milionë eurosh.

Asamblisti i Komunës së Prishtinës nga radhët e Lëvizjes Vetëvendosje, Gëzim Sveçla, ka deklaruar se partia e tij që në fillim ka paraqitur vërejtjet e veta për buxhetin.

Sipas Sveçlës, vërejtjet lidhen me mungesën e transparencës në përpilimin e buxhetit, si dhe me përmbajtjen e tij.

“Lëvizja Vetëvendosje, qysh në draftin e parë të projekt-buxhetit komunal për vitin 2025 i ka paraqitur vërejtjet e veta, e të cilat kanë të bëjnë me mungesën e transparencës në përpilimin e buxhetit, përmbajtjen e të njëjtit, mungesën e projekteve kapitale që kanë qenë premtime zgjedhore të LDK-së dhe të Përparim Ramës si dhe në uljen e investimeve kapitale që planifikohet të bëhet me buxhetin e ri disa fushave jetike për qytetarët e Prishtinës, si shëndetësia, sporti, bujqësia, kultura”, është shprehur ai për Telegrafin.

Ai theksoi se buxheti i propozuar nuk përmbush kërkesat e qytetarëve të Prishtinës.

“Pra, nuk bëhet fjalë për kërkesa tona personale apo partiake, por në vlerësimin tonë buxheti i propozuar nuk i shërben zhvillimit të qytetit, nuk i përmbush nevojat dhe kërkesat imediate të qytetarëve dhe nuk reflekton përparim e mirëqenie. Besojmë se ky draft-buxhet është përpiluar nga subjekti që qeverisë me Prishtinën për fushatë zgjedhore dhe është në funksion të agjendës zgjedhore të LDK 2”, potencoi mes tjerash ai.

Më tej, Sveçla e cilësoi si përgjegjësi të partisë në pushtet sigurimin e numrave të nevojshëm për miratimin e buxhetit.

“Një afat ligjor ka qenë që buxheti të miratohet në shtator. Tashmë kjo nuk ka ndodhur. Në dy seanca ne nuk kemi marrë pjesë në votim, kurse në seancën e tretë nuk kanë ardhë vet ata që e kanë thirrë seancën, kryetari Rama dhe partia në pushtet, LDK, bashkë me partnerët e tyre, AAK dhe të tjerët. Është obligim i partisë në pushtet dhe ekzekutivit që t’i sigurojë numrat e nevojshëm që buxheti të kalojë. Deri tash kjo nuk ka ndodhur dhe përgjegjësia për të gjitha vonesat dhe dëmet, natyrshëm që bie mbi ata që qeverisin me Prishtinën”, nënvizoi ai.

Ndryshe, kryetari i Komunës së Prishtinës, Përparim Rama, ka mbrojtur përpilimin e buxhetit, duke e quajtur atë “super transparent”. Në fjalimin e tij në Kuvendin e Prishtinës, ai kishte theksuar se procesi ka qenë i gjatë dhe ka përfshirë kërkesat e qytetarëve, të cilat janë trajtuar nga drejtoritë përkatëse dhe janë përcjellë deri tek ai.

“Përpilimi i buxhetit super transparent, kemi marrë shumë kërkesa edhe nga qytetarët, por edhe përmes metodave të ndryshme. Përpilimi ka qenë i gjatë dhe transparent, ku kërkesat e qytetarëve shkojnë në drejtori përkatëse, dhe ata përpilojnë më pas kërkesat dhe i drejtojnë tek unë. Kërkesat kanë qenë në investime kapitale”, tha ai.