Bajrami e ashpër me ministren Rizvanolli: Asnjëherë s’ke treguar sa kushtoi energjia në veri

Deputetja e LDK-së, Hykmete Bajrami, është përfshirë në një polemikë me ministren e Ekonomisë Artane Rizvanolli sa i përket kostos së energjisë së paguar për pjesën veriore.

Ishte ministrja Rizvanolli e cila fillimisht tha se po thuhen shumë të pavërteta për çmimin e energjisë në veri.

“Sa i përket energjisë elektrike dhe subvencionimit të energjisë elektrike, u thanë aq shumë të pavërteta sa nuk po di nga t’ia filloj, si dhe për çmimin e energjisë elektrike, siç janë thënë edhe shumë herë të tjera”, tha ministrja Rizvanolli në seancë plenare.

E ashpër me të u tregua deputetja Bajrami, e cila e ftoi ministren Rizvanolli ta thotë të vërtetën e saj.

Teksa lexoi çmimin sipas pasqyrave financiare të KOSTT-it, Bajrami tha se Bordi i KOSTT-it nëse ka thënë të pavërteta u jep llogari deputetëve. Ndërsa e akuzoi ministren se asnjëherë s’ka treguar se sa ka kushtuar energjia në veri.

“Ministre Rizvanolli, pasi u thënë shumë të pavërteta, pse bre s’po e thu të vërtetën tane. Del, trego, të lutem trego sa të ka kushtu energjia elektrike në veri. Unë po them sipas pasqyrave financiare të KOSTT-it, 4.5 milionë më 2019, 8.7 milionë në 2020, 2021 janë 51.6 milionë, 2022 janë 78 milionë, 2023 janë 35.7 milionë. Cila është e pavërteta? Dil, thuje e thirrim KOSTT-in. Ata i raportojnë Kuvendit edhe i thojmë pse po thoni të pavërteta, kaq. Thuje të vërtetën tane. Asnjëherë s’ke qenë në gjendje me thanë kaq ka kushtu energjia në veri. Dil thuje të vërtetën, mos e le askë me spekulu. Kaq e thjeshtë. Po po thuni të pavërteta, po unë s’kam të vërtetë!”, deklaroi deputetja Bajrami.