Ministri i Financave pret votën e opozitës për kredinë 90 milionëshe me Bankën Botërore

Ministri i Financave, Hekuran Murati, ka kërkuar nga deputetët e opozitës që të marrin pjesë në votimin e nesërm për ratifikimin e Marrëveshjes Ndërkombëtare me Bankën Botërore, për një kredi prej 90 milionë euro.

Sipas Muratit, kjo marrëveshje është unike pasi ofron një normë interesi prej 0%, falë përpjekjeve të qeverisë dhe reformave të ndërmarra në bashkëpunim me Bankën Botërore.

“Kjo marrëveshje, me kushte jashtëzakonisht të favorshme, pret ratifikimin në Kuvend që nga maji i këtij viti dhe nesër do të jetë përsëri në rend dite, konkretisht në pikën e gjashtë,” tha ai.

Murati shpreson që edhe deputetët e opozitës do të marrin pjesë në votim, duke i lejuar Kosovës të përfitojë nga kjo marrëveshje.

Ai theksoi se me një normë interesi prej 0% për një periudhë prej 12 vitesh, Kosova do të kursejë mbi 50 milionë euro.