![Ankohen qytetarët, KESCO merr gjobë për shkelje të privatësisë së konsumatorëve](/uploads/zeri.info/images/2024/August/19/auto_auto_fatura-rrymes16898559691724067368.jpg)
Ankohen qytetarët, KESCO merr gjobë për shkelje të privatësisë së konsumatorëve
Agjencia për Informim dhe Privatësi (AIP) ka shqiptuar gjobë ndaj Kompanisë Kosovare për Furnizim me Energji Elektrike SHA (KESCO) për mosndërmarrjen e masave të nevojshme të sigurisë në përpunimin e të dhënave personale gjatë shpërndarjes së faturave për qytetarët.
Kjo agjenci thekson në një njoftim se ka pranuar disa ankesa nga qytetarët (subjektet e të dhënave) lidhur me veprimin se KESCO ka shpërndarë faturat mujore për shpenzimin e energjisë elektrike duke mos i aplikuar masat e sigurisë dhe duke i lënë qasje personave të paautorizuar në të dhënat personale të konsumatorëve, transmeton Klankosova.tv.
“Gjatë shqyrtimit të ankesave, AIP-ja ka konstatuar se KESCO ka dështuar të zbatojë masat e sigurisë për të mbrojtur të dhënat personale të qytetarëve, duke shkelur kështu detyrimet e saj ligjore”.
“Veprimi i Agjencisë për shqiptimin e gjobës ndaj KESCO-s është ndërmarrë pas fushatës ndërgjegjësuese që Agjencia ka zhvilluar në muajin shkurt të vitit 2024, me të gjitha kompanitë që bëjnë shpërndarjen e faturave, me ç ‘rast ka kërkuar zbatimin e detyrimeve ligjore që këto kompani kanë ndaj konsumatorëve. Me qëllim të përgatitjes së kushteve, Agjencia ka kërkuar nga kompanitë që deri më 30 qershor 2024 të ndërmarrin të gjitha masat për të siguruar mbrojtjen e të dhënat personale”.
“Siguria e të dhënave personale është një e drejtë themelore e qytetarëve dhe mbrojtja e këtyre të dhënave duhet të jetë prioritet për çdo kompani që i përpunon të dhënat personale”, thuhet në një njoftimin e AIP-së.