![Bulliqi skeptik që rruga Prishtinë – Podujevë kryhet në vjeshtë](/uploads/zeri.info/images/2024/July/23/auto_auto_prishtine-podujeve-foto-ministria17204584931721770396.jpeg)
Bulliqi skeptik që rruga Prishtinë – Podujevë kryhet në vjeshtë
Kryetari i Komunës së Podujevës, Shpejtim Bulliqi është shprehur i pakënaqur me intensitetin e punimeve për zgjerimin e rrugës magjistrale Prishtinë – Podujevë.
Madje Bulliqi sheh gjasa që ky projekt të mos kryhet në kohë, ashtu siç u premtua, në vjeshtën e këtij viti.
“Vitin e kaluar diku në vjeshtë është lidhur kontrata 38 milionë, nëse nuk gaboj, për ndërtimin e rrugës Prishtinë-Podujevë dhe premtimet kanë qenë që në vitin 2024, që i bie kjo vjeshtë e këtij viti, duhet të përmbyllet kjo rrugë. Faktikisht intensiteti i punimeve që është duke ecur së paku prej kësaj që shoh, kam frikë që do të jetë problematike të përmbyllet në vjeshtën e këtij viti. Në veçanti kur kemi parasysh që janë edhe disa ura të cilat kërkojnë volum më të madh të punëve. Nuk jam i kënaqur me intensitetin e punëve që po i kryen kompanitë e kontraktuara”, është shprehur ai në Tëvë1.
Kreu i Podujevës thotë se nëse arrihet të përfundohen së paku dy trase, do të ishte një sukses i madh.
“Nëse arrihet që së paku dy trasetë e rrugës të kryhen deri në vjeshtën e këtij viti, besoj që do të jetë një sukses i madh, sepse është një rrugë jashtëzakonisht e ngarkuar dhe me trafik dhe kërkesat dhe nevojat kanë qenë kahre që të kryhet ky projekt”, shtoi ai.