![KESCO: Po importojmë një milion euro energji elektrike në ditë](/uploads/zeri.info/images/2024/July/16/auto_auto_Keds-KesCo-16_prill_2015b-Laura_Hasani_copy17086088081721127878.jpg)
KESCO: Po importojmë një milion euro energji elektrike në ditë
KESCO ka njoftuar se për të mbuluar kërkesën e rritur për energji elektrike, importon çdo ditë rreth një milion euro energji elektrike.
“KESCO njofton që për ta mbuluar kërkesën e rritur për energji elektrike është duke importuar çdo ditë rreth një milion euro energji elektrike”.
Përmes një komunikate, KESCO ka thënë se për rritjen e kërkesës për rrymë faktor është “përdorimi masiv i kondicionerëve anekënd Kosovës” pasi temperaturat kanë qenë të larta.
“Deri tek kjo ka ardhur pasi gjatë këtyre ditëve situata elektroenergjetike është vështirësuar tej mase nga disa faktorë. Fillimisht është rritur kërkesa tej mase si pasojë e temperaturave ekstreme të ngrohta që po mbizotërojnë në vendin tonë, duke bërë që kërkesa në kohë piku të kalojë mbi 800 megavate, dukshëm mbi mesataren e kësaj periudhe. Kjo për shkak të përdorimit masiv të kondicionerëve anekënd Kosovës”.
Tjetër faktor “në rëndimin e situatës” KESCO ka thënë se është fakti që njësia B1 e KEK-ut është në remont të planifikuar njëvjetor. KESCO ka shtuar se Kosova, aktualisht, nuk po prodhon më shumë se 500 MW.
Sipas KESCO-s, çmimi për megavat është 200 euro në berzat e rajonit tonë.
“Në rëndimin e situatës po ndikon edhe fakti që njësia B1 e KEK-ut është në remont të planifikuar vjetor, duke bërë që prodhimi vendor të reduktohet me së paku 250 MW. Pra, aktualisht Kosova nuk po prodhon më tepër se 500 MW. Ndërsa, diferenca ndërmjet prodhimit dhe kërkesës po mbulohet nga importi. E edhe çmimet e importit janë rritur shumë ditëve të fundit. Në berzat e rajonit tonë çmimet po sillen mbi 200 euro për megavat. Kjo po e vështirëson shumë situatën, pasi duhet blerë energji nga jashtë me kosto të shtuar”.
KESCO ka kërkuar të kursehet maksimalisht energjia elektrike.
“KESCO mbetet i përkushtuar që t’i furnizojë konsumatorët pa ndërprerje me energji elektrike. Por, kërkon nga të gjithë që të kursejnë maksimalisht energjinë elektrike, si një produkt që është jetik për të gjithë sidomos në kohën e kushteve ekstreme atmosferike”.