![DHTIK: Të zgjidhet çështja e IP Adresave, po dëmtohen shteti dhe biznesi](/uploads/zeri.info/images/2024/July/16/auto_671198-uHZQyqwyIg1721122271.png)
DHTIK: Të zgjidhet çështja e IP Adresave, po dëmtohen shteti dhe biznesi
Dhoma e Tregtisë dhe Industrisë Kosovë (DHTIK) vazhdon të shprehë shqetësimin e saj të thellë lidhur me mosrregullimin e IP Adresave, andaj kërkon edhe një herë nga institucionet qendrore dhe ART-ja të mos lejojë përdorimin e IP-së së Serbisë në Kosovë, pasi të njëjtat janë duke e dëmtuar në vazhdimësi Republikën e Kosovës me cenim të sovranitetit dhe biznesin me miliona euro në vit.
“Duke pas parasysh që aktualisht Kosova nuk ka të drejtë të posedimit të kodit të internetit (ccTLD), kërkesë e DHTIK-së tash e sa kohë ishte dhe mbetet rregullimi i problemit të provajderëve dhe eliminimi i përdorimit të IP adresave nga Serbia dhe këto të fundit të zëvendësohen menjëherë me ato të Shqipërisë, në mënyrë që reklamat në ueb faqe të dalin në gjuhën shqipe. Për njohuri sistemi i ri i marketingut botëror vendos reklama në ueb faqet dhe portalet, në bazë të IP-së së çdo shteti”, thuhet në komunikatën e Dhomë së Tregtisë dhe Industrisë Kosovë.
Sipas DHTIK-së, mosrregullimi i IP Adresave edhe pse i deleguar tash e sa kohë, edhe më tutje mbetet problem për bizneset, i cili është duke u ballafaquar me mosrregullimin e tyre.
Dhoma e Tregtisë, konsideron që me këtë rast, përveç humbjeve të cilat po iu shkaktohen bizneseve, problem tjetër mbetet edhe dëmtimi i imazhit të vendit tonë në aspektin nacional, kjo sepse në vend të paraqitjes së shtetit të Kosovës, kur kërkojmë në linkun “What’s my IP address (https://whatismyipaddress.com/)”, del që Kosova është në Serbi.
DHTIK-ja ka dërguar disa shkresa dhe ka takuar edhe përfaqësuesit e ARKEP-it, për të diskutuar këtë problematikë por nuk po sheh zgjidhje nga kjo e fundit.
“Duke pasur parasysh që ne si Dhomë jemi duke pranuar vazhdimisht ankesa nga qytetarët dhe nga biznesi i mediave, tek të cilat në fund të faqeve po shfaqen reklama në gjuhen serbe, ku me këtë rast në vend që të ofrohen reklama dhe oferta në gjuhën shqipe nga bizneset vendore, qytetarëve dhe bizneseve po i ofrohen ato nga një shtet i huaj, që është kundër Republikës së Kosovës. Andaj, Dhoma e Tregtisë dhe Industrisë e Kosovës, ri kërkon nga Kryeministri, Qeveria e Kosovës dhe ministritë përkatëse që të vendos rregulla për përdorimin e IP adresave”, thuhet në komunikatën e Dhomës së Tregtisë dhe Industrisë Kosovë.