![Lufta ndaj parave false, BQK-ja: 2.5 milionë monedha 2-euroshe janë tërhequr nga qarkullimi](/uploads/zeri.info/images/2024/May/13/auto_2-euro-false1715604845.jpg)
Lufta ndaj parave false, BQK-ja: 2.5 milionë monedha 2-euroshe janë tërhequr nga qarkullimi
Banka Qendrore e Kosovës (BQK) ka raportuar për suksesin e aktiviteteve të koordinuara për luftimin e monedhave të falsifikuara, veçanërisht monedhave dy euro, gjatë fundit të vitit 2023 dhe pjesës së parë të vitit 2024.
BQK-ja ka organizuar takime ndërinstitucionale për këtë qëllim dhe ka zhvilluar aktivitete në përputhje me Planin për zbatim të lehtësuar të Rregullores për operacione me para të gatshme.
![Image](https://zeri.info/uploads/zeri.info/images/2024/May/13/auto_SHQ_shtojca-1_rregullorja1715604852.png)
Në periudhën deri në prill 2024, BQK-ja ka arritur disa rezultate të rëndësishme në luftën kundër parave të falsifikuara dhe zbatimin e masave të rregullores për operacione me para të gatshme:
– Janë tërhequr nga qarkullimi dhe deponuar në BQK rreth 2.5 milionë copë monedha të denominimeve prej 2 eurove;
– Janë detektuar dhe u është parandaluar hyrja në sistemin financiar rreth 54,000 copë monedha të denominimeve prej 2 eurove, duke i tërhequr nga qarkullimi të dyshuara si të falsifikuara;
– Është furnizuar ekonomia me afër 7.4 milionë copë monedha euro plotësisht të reja të të gjitha denominimeve pa asnjë tarifë të aplikuar;
– Është furnizuar ekonomia me afër 5.82 milionë copë kartëmonedha euro plotësisht të reja dhe të përshtatshme për riqarkullim në shumë prej 261.6 milionë eurove;
– Janë importuar monedha krejtësisht të reja 5 milionë copë, ose 8 milionë euro;
– Janë eksportuar 2.4 milionë copë (2.8 milionë euro) të monedhës 2 euro (të tërhequra nga qarkullimi);
– Numri i kartëmonedhave prej 500 (pesëqind) euro të tërhequra nga qarkullimi dhe deponuara në BQK ka kaluar mbi 266,000 (dyqind e gjashtëdhjetë e gjashtë mijë) copë/njësi në vlerë mbi 133 (njëqind e tridhjetë e tre) milionë euro;
– Janë licencuar katër (4) banka për import/eksport të parasë së gatshme; dhe
– 57 autorizime (kryesisht të valutave jo-euro) për transport të parave të gatshme në kundërvlerë të tërësishme prej 177.4 milionë eurove.
![Image](https://zeri.info/uploads/zeri.info/images/2024/May/13/auto_SHQ_shtojca-2_rregullorja1715604854.png)
Përveç kësaj, BQK-ja ka zbatuar Planin për Zbatim të Lehtësuar të Rregullores për Operacione me Para të Gatshme, duke realizuar aktivitete në të gjitha pikat e planit, si funksionalizimi i linjës së telefonit pa pagesë, lehtësimi i kushteve për hapjen e llogarive bankare, dhe pezullimi i përkohshëm i tarifës së BQK-së.
Gjatë kësaj periudhe, BQK-ja ka licencuar 8 degë/zyra të institucioneve financiare, ka vendosur 38 bankomatë/ATM, dhe ka kryer mbi 350 vizita dhe aktivitete promovuese.
BQK-ja ka theksuar se vazhdon të përqendrohet në zgjerimin e qasjes në financa, përfshirjen financiare, edukimin financiar dhe mbrojtjen e konsumatorit.
Banka Qendrore e Kosovës ka inkurajuar qytetarët dhe bizneset të përdorin sa më shumë pagesat elektronike dhe të raportojnë çdo dyshim për monedha të falsifikuara tek autoritetet përgjegjëse. /Zëri