![Kosova bëhet me valutën e vet – monedhën 2 euro false](/uploads/zeri.info/images/2023/September/21/auto_monedha-2-euro-false1695312078.jpg)
Kosova bëhet me valutën e vet – monedhën 2 euro false
Në një kafene në Prishtinë, stafi ka hequr dorë nga kontrolli nëse monedhat prej dy eurosh që njerëzit përdorin për të paguar janë origjinale, pasi një përqindje e lartë janë false, dhe pasi cilësia e lartë e disa falsifikimeve e bën pothuajse të pamundur të dallohet nga origjinalja.
Numri i monedhave false 2 euro në qarkullim ka shënuar një rritje masive këtë vit, sipas agjencive ligjzbatuese, raporton Reuters.
Në një dyqan të vogël afër kafenesë në Prishtinë, me 11 monedha 2 euroshe në arkë, shitësja tha se besonte se gjashtë ishin të falsifikuara dhe ka aq shumë në qarkullim që janë false, sa nuk kishte zgjidhje tjetër veçse t’i pranonte ato.
Në laboratorin e mjekësisë ligjore të policisë së Prishtinës, stafi ekzaminoi më shumë se 30 mijë monedha të falsifikuara 2 euro në gjysmën e parë të këtij viti, krahasuar me 4 mijë e 451 në të njëjtën periudhë të vitit të kaluar.
“Cilësia varion nga shumë e dobët në shumë e mirë”, tha Vjollca Mavriqi, eksperte për paratë e falsifikuara në laborator.
“Më parë, monedhat false nuk ishin magnetike dhe tani janë, më parë kishin probleme me peshën, por tani përputhen me ato origjinale”.
Policia tha se vitin e kaluar ka dërguar 804 raste në prokurori në lidhje me falsifikimin e parave dhe 486 deri më tani këtë vit. Në prill ata arrestuan një burrë dhe një grua duke u përpjekur të sillnin rreth 11 mijë monedha false 2 euro në Kosovë nga Maqedonia e Veriut.
Shumë video në gjuhën shqipe në rrjetet sociale bëjnë oferta për monedha false ose kartëmonedha të tjera euro, të cilat shiten për 10%-20% të vlerës së tyre nominale, transmeton Klankosova.
Drejtori i Prishtina Parkingut, Sokol Havolli, tha se kompania po merrte aq shumë monedha false 2 euro, që arrijnë shumën 150 euro në ditë, sa që refuzoi ta pranonte fare monedhën. Tani atij i janë dhënë makineri të mëdha, të dhuruara nga bankat lokale, për të identifikuar monedhat false.
Banka Qendrore e Kosovës i tha Reuters-it me email se bankat dhe institucionet e tjera financiare duhet të raportojnë të gjitha paratë e falsifikuara të dorëzuara nga klientët.
Por për një menaxher supermarketi në Prishtinë, i cili nuk pranoi të japë emrin e tij dhe që duhet të depozitojë të ardhurat e tij ditore në bankë, është më e lehtë t’i kalojë monedhat 2 euro te klientët e tjerë në vend që të rrezikojë ndjekjen penale duke i çuar ato në një bankë.
“Unë nuk i depozitoj këto monedha në bankë sepse e di që do të thërrasin policinë dhe mund të përfundoj duke u arrestuar… Unë ua kthej klientëve mëngjesin tjetër e më pas marr të tjera gjatë ditës”, tha ai.
“Gjithmonë jemi ankuar në Kosovë se nuk kemi valutë tonën, po duket se kemi tani – monedha false 2 euro”.