'Fol' publikon dyshimet për keqpërdorim në autostradën Prishtinë-Gjilan-Dheu i Bardhë

'Fol' publikon dyshimet për keqpërdorim në autostradën Prishtinë-Gjilan-Dheu i Bardhë

Ekonomia nëntor 15, 2018 - 11:42
Lexo tjera detaje

Lëvizja FOL ka publikuar një sërë dyshimesh për keqpërdorime në ndërtimin e autostradës Prishtinë-Gjilan-Dheu i Bardhe, nga monitorimi që i ka bërë kësaj kontrate milionëshe.

Elbasan Racaj nga kjo organizatë duke publikuar të gjeturat ka treguar se gjatë monitorimit në tërësi të kontratës është vërejtur se procesverbali i hapjes së tenderit dhe prokurimit nuk janë të njëjtat, raporton Zëri.Info

"Mungesa e transparencës nga (MI) na ka shtyrë të vlerësojmë kontratën nga fillimi për të parë ku po shkojnë 88 milionë euro të buxhetit. Ne kemi gjetur se procesverbali i hapjes së tenderit dhe prokurimit nuk janë të njejta", ka  thënë në fjalën hyrëse Racaj.

Më tej, ai ka bërë edhe një përmbledhje të kontratës duke filluar me ecurinë e procesit.

"Projekti është i ndarë ne 8 lot dhe arrin shifrën prej 88 milionë eurosh. Punimet kanë filluar në maj, kompanitë ankohen se punimet janë  vonuar si rezultat i mungesës së shpronësimit", ka shtuar ai.

Si probleme kryesore gjatë monitorimit u përmenden mungesa e planit të prokurimit, dyshimet për kohëzgjatjen e punimeve dhe vonesat në procesin e shpronësimit.

Për këto të gjetura nuk u interesuan zyrtarët e Ministrisë së Infrastrukturës, që pavarësisht se ishin të ftuar nuk qenë prezent në diskutim.

Sefer Tasholli nga komuna e Lipjanit, ka përmendur problemet që pritet t'iu shkaktohen bujqve nga ndërtimi i autostradës me ndarje të pronës duke aluduar se procesi i shpronësimit nuk ka shkuar ne rregull.

"Pjesa kah Zhegrovci është tokë pjellore dhe do të kemi probleme se bujqëve do t'iu ndahet prona. Shpronësimi nuk është bërë njësoj por qytetarët brengosen se nuk është në rregull. Dikush ka blerë prona në momentin që e ka ditur ka do të kaloj autostrada në atë pjesë", ka thënë ai.

Ndryshe, kjo kontratë kap shifrën e 88 milionë eurove./ZËRI/