Sërish ngjarje e rëndë në Turqi, sulmohet një tjetër shkollë - disa të plagosur

Një incident i armatosur është raportuar në një shkollë të mesme në provincën e Kahramanmaras, ku persona të paidentifikuar kanë hapur zjarr brenda ose pranë ambienteve të institucionit arsimor.

Sipas autoriteteve lokale, ndërtesa e shkollës është evakuuar menjëherë pas ngjarjes, ndërsa në vendngjarje kanë mbërritur forca të shumta policie dhe ekipe emergjence. Deri tani raportohet se disa persona kanë mbetur të plagosur, por nuk janë bërë të ditura detaje mbi gjendjen e tyre.

Ngjarja ka shkaktuar panik në zonë, ndërsa autoritetet kanë nisur hetimet për të sqaruar rrethanat dhe motivet e sulmit.

Guvernatori i provincës, Mükerrem Ünlüer, deklaroi se situata po hetohet në mënyrë të plotë dhe se informacionet paraprake konfirmojnë praninë e të plagosurve.

“Po ndodh një incident i rëndë në një nga shkollat tona. Kemi marrë njoftime për të plagosur dhe po e trajtojmë çështjen me seriozitet të plotë”, u shpreh ai.

Autoritetet turke vijojnë hetimet për të identifikuar autorin ose autorët e sulmit, ndërsa zona mbetet nën masa të rrepta sigurie. /euronews