Rutte takohet me Trumpin në Washington mes kërcënimit të SHBA-së për t’u larguar nga NATO-ja

Sekretari i përgjithshëm i NATO-s, Mark Rutte, fillon një vizitë treditore të planifikuar në Uashington të mërkurën, mes kërcënimeve të ripërtërira nga presidenti i SHBA-së, Donald Trump, se ai po shqyrton tërheqjen nga aleanca.

Rutte pritet të takohet me Trumpin, pas qetësimit të tensioneve me Teheranin të martën, i cili thuhet se përfshin një armëpushim dyjavor dhe rihapjen e ngushticës së Hormuzit, megjithëse kushtet mbeten të paqarta, shkruajnë mediat e huaja.

Ai do të takohet me presidentin e SHBA-së së bashku me Sekretarin e Shtetit, Marco Rubio, dhe Sekretarin e Mbrojtjes, Pete Hegseth, në Shtëpinë e Bardhë më vonë të mërkurën.

Rutte gjithashtu do të zhvillojë bisedime me anëtarë të Kongresit dhe do të mbajë një fjalim në Fondacionin dhe Institutin Presidencial Ronald Reagan të enjten.

Një çështje kyçe gjatë vizitës ka të ngjarë të jetë zhgënjimi në Uashington për refuzimin e aleatëve për t'u bashkuar me Shtetet e Bashkuara dhe Izraelin në fushatën e tyre ushtarake kundër Iranit, ose për të lejuar avionët amerikanë të përfshirë në konflikt të përdorin hapësirën e tyre ajrore.

Vendimi i disa vendeve të NATO-s e ka zemëruar Trumpin, duke e bërë atë të kritikojë qeveritë evropiane dhe të vërë në pikëpyetje vlerën e anëtarësimit të vazhdueshëm të SHBA-së në aleancë.

Trumpi ka shprehur prej kohësh shqetësim për atë që ai e sheh si kontribut joproporcional të Amerikës në sigurinë evropiane.

Presidenti amerikan ka sulmuar vazhdimisht aleatët e NATO-s për mosndihmë gjatë fazës së nxehtë të luftës, duke e quajtur aleancën një “tigër letre” pa SHBA-në.

Në komentet e javës së kaluar, ai tha se do ta rishqyrtonte kontributin e saj në NATO dhe komentet e tij u mbështetën nga Marco Rubio, i cili sugjeroi që SHBA-ja do të rivlerësonte marrëdhënien e tyre me aleatët.