Shefi i mbrojtjes i Norvegjisë: Oslo në gatishmëri, nuk përjashtojmë skenar pushtimi nga Rusia
Shefi i ushtrisë norvegjeze ka deklaruar se Oslo nuk mund ta përjashtojë mundësinë e një pushtimi të ardhshëm rus, duke paralajmëruar se Moska mund të ndërmarrë veprime ushtarake për të mbrojtur kapacitetet e saj bërthamore të vendosura në veri të largët.
“Ne nuk e përjashtojmë një marrje territori nga Rusia si pjesë e planit të saj për të mbrojtur aftësitë bërthamore, që janë e vetmja gjë që ende përbën një kërcënim real për Shtetet e Bashkuara,” tha gjenerali Eirik Kristoffersen, shefi i mbrojtjes së Norvegjisë, shkruan The Guardian.
Ai theksoi se Rusia nuk ka objektiva pushtuese ndaj Norvegjisë në të njëjtën mënyrë si ndaj Ukrainës apo ish-territoreve sovjetike, por vuri në dukje se një pjesë e madhe e arsenalit bërthamor rus ndodhet në gadishullin Kola, pranë kufirit norvegjez. Aty përfshihen nëndetëse bërthamore, raketa tokësore dhe avionë me kapacitet bërthamor, të cilat do të ishin thelbësore në rast të një konflikti mes Rusisë dhe NATO-s.
“Nuk e heqim këtë skenar nga tavolina, sepse është ende një opsion për Rusinë që të sigurojë aftësitë e saj bërthamore, veçanërisht kapacitetin e goditjes së dytë. Ky është skenari për të cilin ne planifikojmë në veriun e lartë”, u shpreh ai.
Në një intervistë të gjerë për gazetën The Guardian, Kristoffersen kritikoi ashpër komentet e fundit të Donald Trump për Groenlandën, si dhe pretendimet e tij se vendet aleate nuk kishin shërbyer në vijën e parë të frontit në Afganistan.
“Kjo që tha nuk kishte kuptim dhe të gjithë miqtë e mi amerikanë nga Afganistani e dinë këtë”, tha Kristoffersen, oficer karriere që ka shërbyer disa herë në Afganistan.
“Ne ishim patjetër në vijën e parë. Kryem të gjithë spektrin e misioneve – nga arrestimi i liderëve talebanë, te trajnimi i forcave afgane dhe mbikëqyrja. Humbëm 10 norvegjezë. Humbja e miqve të mi ishte reale”, shtoi ai.
Ai tha se deklaratat e Trump nuk e prekën personalisht, por shprehën shqetësim për veteranët norvegjezë dhe familjet e ushtarëve të rënë.
Kristoffersen është shef i mbrojtjes së Norvegjisë që nga viti 2020 dhe drejton si forcat e armatosura ashtu edhe shërbimin e inteligjencës. Mandati i tij ka përkuar me ndryshime të thella në sigurinë evropiane pas pushtimit rus të Ukrainës, si dhe me anëtarësimin e Suedisë dhe Finlandës në NATO dhe forcimin e zonave kufitare veriore të Norvegjisë.
Ai theksoi se, përveç një pushtimi klasik, Norvegjia po përgatitet edhe për kërcënime hibride si sabotazhi.
“Nëse përgatitesh për më të keqen, je automatikisht më i aftë të përballosh edhe kërcënime të tjera”, tha ai.
Megjithatë, Norvegjia dhe Rusia vazhdojnë të mbajnë kontakte të drejtpërdrejta për operacione kërkim-shpëtimi në Detin Barenc dhe takime të rregullta në kufi mes përfaqësuesve ushtarakë.
Kristoffersen ka propozuar krijimin e një linje direkte ushtarake mes dy kryeqyteteve për të shmangur përshkallëzime të mundshme nga keqkuptimet.
Sipas tij, aktivitetet ruse në veri kanë qenë më pak agresive sesa në Detin Baltik.
Sa i përket arkipelagut të Svalbardit, ku ndodhet edhe një vendbanim rus dhe që sipas një traktati të vitit 1920 nuk mund të militarizohet, ai tha se Rusia po e respekton marrëveshjen dhe se Norvegjia nuk ka plane për militarizim.
Akuzat e Moskës për “militarizim të fshehtë” të Svalbardit, sipas tij, janë thjesht propagandë.
