Anesteziologu në Francë dënohet me burgim të përjetshëm pasi helmoi qëllimshëm 30 pacientë, 12 prej tyre vdiqën

Një ish-anesteziolog është dënuar me burgim të përjetshëm për helmim të qëllimshëm të 30 pacientëve, duke përfshirë 12 që vdiqën sa ishte në detyrën e anesteziologut në Francë.

Një gjykatë në qytetin Besançon në Francën lindore e shpalli Frederic Pechier fajtor për kontaminimin e qeseve të infuzionit me substanca që shkaktuan arrest kardiak ose hemorragji.

Viktima e tij më e vogël, një fëmijë katërvjeçar, u mbijetoi dy arresteve kardiake gjatë një operacioni rutinë të bajameve në vitin 2016.

Viktima më e vjetër ishte 89 vjeç, shkruan BBC.

“Ju jeni Doktor Vdekja, një helmues, një vrasës. Ju turpëroni të gjithë mjekët”, thanë prokurorët javën e kaluar.

“E keni kthyer këtë klinikë në një varrezë”.

Pechieri u vu nën hetim për herë të parë tetë vjet më parë, kur dyshohej se kishte helmuar pacientë në dy klinika në Besançon midis viteve 2008 dhe 2017.

Viktima e tij e parë e njohur, Sandra Simard, ishte 36 vjeç kur pësoi një arrest të papritur kardiak në mes të një operacioni në shtyllën kurrizore. Ajo mbijetoi, megjithëse ra në koma.

Testet në qeset e saj të infuzionit treguan përqendrime kaliumi 100 herë më të larta se doza e pritur dhe alarmi u dha te prokurorët vendas.

Gjatë 15 javëve të gjyqit, Pechieri ndonjëherë pranoi se disa nga pacientët që u sëmurën ose vdiqën mund të jenë helmuar, por ai mohoi çdo keqbërje.

“E kam thënë edhe më parë dhe do ta them përsëri, unë nuk i kam helmuar. Gjithmonë e kam mbajtur betimin e Hipokratit”, deklaroi ai. /abcnews