Hong-Kong, 44 të vdekur nga zjarri masiv në kompleksin e apartamenteve

Të paktën 44 persona kanë vdekur në një zjarr që përfshiu një kompleks apartamentesh në Hong-Kong, ndërsa 45 të tjerë ndodhen në gjendje kritike në spital. Policia njoftoi se rreth 300 persona rezultojnë të zhdukur. Tre persona janë arrestuar.

Zjarrfikësit punuan gjatë gjithë natës për të arritur te banorët që mund të ishin bllokuar në katet e sipërme të kompleksit të apartamenteve Wang Phuc Court, për shkak të tymit të dendur nga zjarri që shpërtheu një ditë më parë.

Kompleksi i mbipopulluar përbëhet nga 2.000 apartamente të shpërndara në tetë blloqe, ku jetojnë mbi 4.600 njerëz.

Deri të enjten në mëngjes, autoritetet thanë se e kishin vënë zjarrin nën kontroll në katër blloqe, ndërsa operacionet vazhdonin në tre blloqet e tjera.

Pamjet nga vendngjarja tregojnë flakë që ende shpërthejnë nga të paktën dy kulla 32-katëshe të veshura me skela bambuje.

Policia tha se, përveç mbulimit të ndërtesave me rrjeta mbrojtëse dhe plastikë që mund të mos i përmbushnin standardet e sigurisë kundër zjarrit, disa dritare në një ndërtesë që nuk ishte përfshirë nga flakët rezultuan të ishin vulosur me material shkumë, i instaluar nga kompania e ndërtimit që po kryente punimet e mirëmbajtjes.

“Kemi arsye të besojmë se kompanitë përgjegjëse kanë qenë jashtëzakonisht të pakujdesshme, duke çuar në këtë aksident dhe në përhapjen e pakontrolluar të zjarrit, që rezultoi në një numër të madh viktimash”, tha Eileen Chung, mbikëqyrëse në Policinë e Hong-Kongut.

Tre burra nga kompania e ndërtimit, dy drejtorë dhe një konsulent inxhinierik, u arrestuan nën dyshimin për vrasje të paqëllimshme.

Skelat prej bambuje, ndonëse tradicionale dhe të përdorura gjerësisht në Hong-Kong, do të hiqen gradualisht nga projektet publike për shkak të shqetësimeve për sigurinë, sipas njoftimit të qeverisë të bërë në fillim të këtij viti. /rtklive