Musk mund të bëhet trilioneri i parë në histori, pasi u miratua paketa Tesla
Elon Musk, njeriu më i pasur në botë, ka fituar votimin e aksionarëve të Tesla, duke marrë mundësinë të bëhet trilioneri i parë në histori. Më shumë se 75% e aksionarëve të mbledhur në selinë e kompanisë në Austin, Texas, miratuan planin që i jep Musk aksione me vlerë deri në 1 trilion dollarë, nëse ai arrin disa objektiva të caktuara të performancës gjatë dhjetë viteve të ardhshme.
“Grup fantastik aksionarësh,” tha Musk pas votimit, duke shtuar “Mbajeni aksionin tuaj të Tesla.”
Pavarësisht rënies së shitjeve, pjesës së tregut dhe fitimeve të kompanisë, investitorët vazhdojnë të kenë besim tek Musk. Kjo fitore vjen vetëm tre ditë pas një raporti nga Evropa, ku u raportua se shitjet e Tesla ranë përsëri muajin e kaluar, përfshirë një rënie prej 50% në Gjermani.
Për të përfituar plotësisht nga paketa, Musk duhet të arrijë objektiva të mëdha, si rritja gjashtëfish e vlerës së Tesla në treg dhe prodhimi i 20 milionë veturave elektrike gjatë dekadës së ardhshme, si dhe vendosja në përdorim e më shumë se 1 milion robotëve humanoidë që ai i quan “ushtria e robotëve”.
Nëse arrin këto qëllime, Musk mund të tejkalojë pasurinë historike të John D. Rockefeller, që sipas Guinness World Records ka qenë 630 miliardë dollarë me vlerën e sotme, ndërsa pasuria aktuale e Musk vlerësohet në 493 miliardë dollarë, sipas Forbes.
Votimi u zhvillua pavarësisht kundërshtimeve nga fonde të mëdha si Calpers dhe fondi sovran i Norvegjisë, si dhe kritikave nga grupet mbikëqyrëse Institutional Shareholder Services dhe Glass Lewis, të cilat e cilësuan paketën si të tepruar. Musk i quajti ata “terroristë korporatash” në një takim me investitorët.
Pas miratimit të paketës, aksionet e Tesla u rritën me 1.5%, duke arritur në 447.27 dollarë në tregtimin pas orarit zyrtar. Musk tha se votimi nuk kishte të bënte vetëm me paratë, por me rritjen e pjesës së tij të kontrollit në kompani, e cila do të dyfishohet në pothuajse 30%, shkruan AP. /rtklive
