Të shtëna armësh dhe zjarr te tendat e mbështetësve të Vuçiqit para parlamentit serb

Të shtëna me armë u dëgjuan jashtë ndërtesës së parlamentit të Serbisë në Beograd të mërkurën, ku një person mbeti i plagosur, raportuan mediat lokale.

Një video e publikuar nga media NOVA, vendndodhja e së cilës është konfirmuar nga Reuters, tregonte oficerë të armatosur sigurie duke iu afruar një tende të madhe jashtë parlamentit, transmeton Zeri.info.

U dëgjuan disa të shtëna dhe më pas shpërtheu zjarr brenda tendës, njëra nga disa që janë ngritur këtë vit nga mbështetësit e presidentit Aleksandar Vuçiqit gjatë protestave kundër qeverisë.

Nuk ishte e qartë se kush hapi zjarr apo si nisi zjarri.

Policia lokale nuk pranoi të komentojë.

NOVA raportoi se një person është plagosur. N1 TV njoftoi se një burrë 57-vjeçar u plagos nga një plumb dhe ndodhet në gjendje stabile.

Një video tjetër e publikuar në platformën X tregonte një burrë të shtrirë në tokë me duart pas shpine, i rrethuar nga oficerë policie. /Zëri