Ushtria izraelite plagosi 10 palestinezë në Bregun Perëndimor të pushtuar

Shumë të tjerë pësuan asfiksi nga gazi lotsjellës pasi forcat izraelite qëlluan ndaj civilëve në Nablus dhe Qalandiya.

Ushtria izraelite plagosi të paktën 10 palestinezë në zona të ndryshme të Bregut Perëndimor të pushtuar të mërkurën në mbrëmje, sipas mjekëve dhe burimeve lokale.

Shoqata Palestinezë e Gjysmëhënës së Kuqe (PRCS) njoftoi se një person u plagos nga plumbat e ushtrisë në Qalandiya, në veri të Jeruzalemit Lindor, ndërsa një tjetër u plagos në qytetin Al-Ram.

Agjencia shtetërore palestineze Wafa raportoi se forcat izraelite hodhën gaz lotsjellës drejt shtëpive pranë murit ndarës në Qalandiya, duke shkaktuar asfiksi te shumë banorë.

Në një deklaratë tjetër, PRCS-ja tha se katër persona u plagosën nga të shtënat izraelite gjatë një operacioni në qytetin verior të Nablusit. Një 15-vjeçar u plagos nga copëzat e municionit.

Sipas Wafa-s, numri i civilëve të plagosur në Nablus u rrit në tetë, përfshirë tre fëmijë.

Ushtria gjithashtu përdori granata shokuese dhe gaz lotsjellës ndaj civilëve në qendër të qytetit.

Një i ri u arrestua dhe automjeti i tij u konfiskua nga ushtria para se të tërhiqej nga qyteti, shtoi agjencia.

Dëshmitarë i thanë Anadolu-s se bastisjet izraelite shënjestruan disa ndërtesa publike, përfshirë selinë e zjarrfikësve të Nablusit, ku disa palestinezë u ndaluan dhe iu nënshtruan hetimeve në terren.

Aktivistët publikuan në rrjete sociale foto të ndërtesave të dëmtuara.

Autoritetet lokale raportojnë se më shumë se një mijë palestinezë janë vrarë në Bregun Perëndimor, rreth 10.300 janë plagosur dhe mbi 20.000 janë arrestuar, përfshirë 1.600 fëmijë, që nga fillimi i luftës në Gaza në tetor 2023.

Në një opinion historik të korrikut të kaluar, Gjykata Ndërkombëtare e Drejtësisë e shpalli të paligjshëm pushtimin izraelit të territoreve palestineze dhe bëri thirrje për evakuimin e të gjitha vendbanimeve në Bregun Perëndimor dhe Jerusalemin Lindor. /TRTBallkan