Izraeli s’i ndal sulmet në Gazë, 22 të vrarë - prej tyre 9 fëmijë

Të paktën 22 persona, duke përfshirë nëntë fëmijë, janë vrarë nga sulmet ajrore izraelite në qytetin e Gazës, sipas autoriteteve palestineze.

Zëdhënësi i mbrojtjes civile në Gazë, Mahmoud Bassal, e përshkroi sulmin si një “masakër të tmerrshme”.

Pamje nga vendi i ngjarjes, në zonën Souq Firas, tregojnë trupat e fëmijëve të nxjerrë nga rrënojat.

“Ne ishim në gjumë nën kujdesin e Zotit, nuk na paralajmëruan – ishte një surprizë,” tha Sami Hajjaj, një banor lokal.

Ai shtoi se në shënjestër ishin rreth 200 persona, gjashtë deri në shtatë familje që jetonin në atë zonë. Ushtria izraelite deklaroi se objektivi i sulmit ishin militantë të Hamasit dhe se ishin bërë përpjekje për të shmangur viktimat civile.

Sipas mjekëve në spitale në territorin e kontrolluar nga Hamasi, numri total i të vrarëve sot në Gazë ka arritur në 51.

Ndërkohë, Forcat Izraelite po avancojnë drejt qendrës së qytetit të Gazës, duke rrezikuar jetën e mijëra palestinezëve që kishin vendosur të qëndronin, me shpresën se presioni ndërkombëtar do të çonte në një armëpushim.

Organizata Palestineze e Gjysmëhënës së Kuqe njoftoi se stacioni i oksigjenit në Spitalin Al-Quds ka ndaluar së funksionuari për shkak të zjarrit izraelit mbi të. Sipas tyre, forcat izraelite ndodhen pranë portës jugore të spitalit dhe nuk lejojnë asnjë të hyjë apo të dalë.

OKB dhe organizatat humanitare kanë paralajmëruar se qyteti i Gazës është në prag të urisë për shkak të bllokadës dhe ofensivës së vazhdueshme. Rreth 300,000 persona janë larguar nga qyteti në javët e fundit, por vlerësohet se rreth 700,000 ende ndodhen atje.

Sipas Ministrisë së Shëndetësisë në Gazë, më shumë se 65.000 palestinezë janë vrarë që nga 7 tetori 2023, më shumë se gjysma e tyre gra dhe fëmijë.

Valë e fundit e dhunës shpërtheu pas sulmit të 7 tetorit 2023, kur militantë të Hamasit sulmuan territorin izraelit, duke vrarë rreth 1.200 persona – shumica civilë – dhe rrëmbyen rreth 250 të tjerë. /abcnews