Vazhdojnë vonesat në aeroportin e Berlinit për shkak të sulmit kibernetik

Aeroporti i Berlinit po punon për të rikthyer sistemet e regjistrimit dhe pranimit të bagazheve pas një sulmi kibernetik në fundjavë, teksa priten vonesa dhe anulime të mëtejshme të mërkurën, ka thënë operatori i aeroportit në një deklaratë.

Aeroporti është një nga disa aeroportet në të gjithë Evropën të prekur nga ndërprerjet, si pasojë e një sulmi me programin ransomware ndaj ofruesit të softuerit Collins Aerospace, i cili ka prekur dhjetëra fluturime dhe mijëra pasagjerë që nga e premtja.

“Mund të duhen disa ditë të tjera para se aeroporti i kryeqytetit gjerman të ketë përsëri softuer funksional dhe të sigurt, teksa stafi po punon me zell për të përpunuar manualisht pasagjerët, ka thënë operatori BER në një deklaratë. Ofruesi i softuerit “ka thirrur ekspertë të tjerë dhe po punon urgjentisht për të gjetur një zgjidhje”, ka shtuar ai.

Operatori ka kërkuar nga pasagjerët që të jenë të përgatitur për vonesa të gjata, teksa i ka inkurajuar njerëzit të kontrollojnë paraprakisht linjat ajrore nëse fluturimi i tyre ishte ende i planifikuar të ndodhte.

Collins Aerospace ka thënë të hënën se ishte duke punuar me aeroportet e prekura, të cilat përfshijnë gjithashtu Brukselin dhe Heathrow të Londrës, më të ngarkuarit në Evropë.

Aeroporti i Berlinit ishte veçanërisht i ngarkuar pasi një maratonë u zhvillua në qytet gjatë fundjavës, teksa shumë vrapues përpiqeshin të ktheheshin në shtëpi.