DASH-i konfirmon vizitën e Rubios në Arabinë Saudite për bisedime me delegacionin ukrainas
Sekretari amerikan i Shtetit, Marco Rubio do të jetë në Arabinë Saudite nga 10-12 mars për bisedime me anëtarët e një delegacioni të rangut të lartë nga Ukraina.
Kështu ka thënë zëdhënësja e Departamentit Amerikan të Shtetit, Tammy Bruce, transmeton Ukrinform.
“Sekretari i Shtetit, Marco Rubio do të udhëtojë në Jeddah të Arabisë Saudite nga 10-12 mars për bisedime me homologët ukrainas për të çuar përpara qëllimin e presidentit për t’i dhënë fund luftës Rusi-Ukrainë”, ka thënë ajo.
Bruce shtoi se, ndërsa është në Jeddah, Rubio do të takohet gjithashtu me princin e kurorës saudit Mohammed bin Salman Al Saud për të diskutuar “mënyrat për të avancuar interesat e përbashkëta në rajon dhe për të forcuar marrëdhëniet SHBA-Arabia Saudite”.
Sipas saj, Rubio do të jetë në Charlevoix, Kanada, në datat 12-14 mars, ku do të takohet me homologët e tij të G7.
“Angazhimet e Sekretarit Rubio do të çojnë përpara interesat e SHBA-së për paqen dhe sigurinë, bashkëpunimin strategjik dhe stabilitetin global. Diskutimet do të fokusohen në konfliktet në Lindjen e Mesme dhe Evropë, bashkëpunimin në Afrikë dhe Indo-Paqësorin dhe stabilitetin në hemisferën perëndimore”, përfundoi Bruce.
Siç raporton Ukrinform, presidenti Volodymyr Zelensky shprehu besimin se takimi i delegacioneve ukrainase dhe amerikane në Arabinë Saudite do të jetë produktiv.
Në delegacionin ukrainas që do të takohet me palën amerikane në Arabinë Saudite janë shefi i Zyrës së Kryeministrit, Andriy Yermak, zëvendësi i tij, Pavlo Palisa, ministri i Jashtëm, Andrii Sybiha dhe ministri i Mbrojtjes, Rustem Umerov. /Telegrafi
