Çfarë tha Trumpi për Gazën që shkaktoi kaq shumë shqetësim?

Donald Trump ka qenë në detyrë vetëm një javë, por prania e tij tashmë po ndihet fort në Lindjen e Mesme.

Komentet që ai bëri gjatë fundjavës duket se do të hedhin një hije mbi rajonin këtë javë pas armëpushimit të fundit.

Shkurtimisht, bëhet e ditur se Trump foli për zbrazjen e Rripit të Gazës.

Por çfarë tha në të vërtetë?

Ai po fliste me gazetarët në bordin e Air Force One kur hodhi idenë e zhvendosjes së popullsisë së enklavës, shkruan SkyNews.

Trumpi tha: “Ju po flisni ndoshta për një milion e gjysmë njerëz dhe ne thjesht e pastrojmë të gjithë këtë gjë dhe themi se ka mbaruar”.

Presidenti amerikan pretendoi se ia kishte thënë këtë mbretit të Jordanisë në një telefonatë që ata mbajtën në të njëjtën ditë, duke shtuar: “Unë i thashë atij se do të doja që ju të pranoni refugjatë palestinezë sepse unë po e shikoj Rripin e Gazës dhe është një rrëmujë”.

Raportohet se ai i bëri një thirrje të ngjashme edhe presidentit egjiptian Abdel Fattah al Sissi.

Por, nuk ishte e qartë, madje as për aleatët e Trumpit, se sa serioz ishte ai apo implikimet e plota të fjalëve të tij.

Senatori Lindsey Graham, i cili është i afërt me Trumpin, pyetur se çfarë donte të thoshte presidenti, tha: “Unë me të vërtetë nuk e di”.

Ndryshe, ai shtoi se sugjerimi nuk është i realizueshëm.

“Ideja që të gjithë palestinezët do të largohen dhe do të shkojnë diku tjetër, nuk e shoh të jetë tepër praktike”, përcjell telegrafi.

Çdo zhvendosje e detyruar do të përfaqësonte një krim lufte, sipas ligjit ndërkombëtar.