Bora e madhe bllokon aeroportet dhe rrugët në Mbretërinë e Bashkuar, pamje të reshjeve të dendura

Reshjet e dendura të borës në Britaninë e Madhe kanë bërë që aeroportet në Liverpool, Manchester dhe Leeds të mbyllin pistat e tyre.

Moti i keq pritet të vazhdojë deri të dielën me shërbimin e motit duke lëshuar një sërë paralajmërimesh.

Bëhet e ditur se të gjitha fluturimet për në aeroportin e Manchesterit janë devijuar diku tjetër.

Aeroporti John Lennon i Liverpoolit po përpiqet të pastrojë pistën, ndërsa aeroporti i Leeds Bradford po përballet gjithashtu me anulime dhe vonesa.

Raportohet se Zyra Met në Mbretërinë e Bashkuar ka lëshuar tetë paralajmërime për motin, me dy prej tyre të cilat konsiderohen më serioze dhe paralajmërojnë rrezik të mundshëm për jetën.

Ka pasur paralajmërime për akull dhe borë, nga të cilat kjo e fundit pritet të vazhdojë të bjerë deri të dielën, ku parashikohet të grumbullohen deri në 40 cm borë në zonat më të prekura.

Ndryshe, shërbimi i motit i ka njoftuar qytetarët që të përgatiten për vonesa dhe anulime të trenave, ndërprerje të energjisë elektrike dhe probleme me rrugë në zonat e prekura. /euronews