Trump do të dënohet para se të marrë detyrën, por gjykatësi jep shenja se nuk do të ketë burgim
Një gjykatës ka urdhëruar që Donald Trump të dënohet më 10 janar për çështjen e pagesave në këmbim të heshtjes në Nju Jork – më pak se dy javë para se të betohet si president.
Gjykatësi i Nju Jorkut, Juan Merchan sinjalizoi se ai nuk do ta dënonte Trumpin me burgim, me kusht ose gjobë, por në vend të kësaj do t’i jepte një “lirim të pakushtëzuar” dhe shkroi në urdhrin e tij se presidenti i zgjedhur mund të paraqitej personalisht ose virtualisht për seancën dëgjimore.
Trump ishte përpjekur të përdorte fitoren e tij në zgjedhjet presidenciale për të pushuar çështjen kundër tij, shkruan BBC, transmeton Gazeta Express.
Presidenti i zgjedhur ka postuar në mediat sociale duke hedhur poshtë urdhrin e gjyqtarit si një “sulm politik të paligjshëm” dhe duke e quajtur çështjen “asgjë veçse një sajesë të manipuluar”.
Trump u dënua në maj për 34 akuza për falsifikim të të dhënave të biznesit në lidhje me një pagesë prej 130,000 dollarë për yllin e filmave për të rritur Stormy Daniels.
Akuzat kishin të bënin me përpjekjet për të mbuluar rimbursimet ndaj ish-avokatit të tij, Michael Cohen, i cili në ditët e fundit të fushatës zgjedhore të 2016-ës e pagoi yllin e filmave për të rritur që të heshtë për një takim të dyshuar seksual me Trump.
Presidenti i zgjedhur ka mohuar të gjitha këto dhe është deklaruar i pafajshëm, duke argumentuar se rasti ishte një përpjekje për të dëmtuar fushatën e tij presidenciale të vitit 2024.
Në postimin në platformën e tij “Truth Social” të shtunën, Trump tha se urdhri i dënimit të gjyqtarit “shkon në kundërshtim me Kushtetutën tonë dhe, nëse lejohet, do të ishte fundi i Presidencës siç e njohim ne”.
Zëdhënësi i Trump, Steven Cheung më herët e quajti urdhrin pjesë të një “gjuetie shtrigash”.
“Presidenti Trump duhet të lejohet të vazhdojë procesin e tranzicionit presidencial dhe të ekzekutojë detyrat jetike të presidencës, i papenguar nga mbetjet e kësaj apo ndonjë mbetjeje të gjuetisë së shtrigave”, tha Cheung.
“Nuk duhet të ketë asnjë dënim dhe Presidenti Trump do të vazhdojë të luftojë kundër këtyre mashtrimeve derisa të shuhen të gjithë”.
Trump kishte argumentuar se çështja penale gjatë presidencës së tij do të pengonte aftësinë e tij për të qeverisur.
Gjyqtari Merchan tha se ai ishte këshilluar për disa masa që mund të përdorte, të cilat mund të qetësonin shqetësimet e Trumpit për shpërqendrimin nga një çështje penale gjatë kohës që shërben si president, i cili nuk arrinte në “mjetin juridik ekstrem” të përmbysjes së vendimit të jurisë.
Opsionet e tij përfshinin shtyrjen e dënimit derisa Trump, 78 vjeçar, të largohet nga Shtëpia e Bardhë në vitin 2029, ose garantimin e një dënimi që nuk do të përfshinte burgim.
Trump fillimisht, dhe pa sukses, kishte argumentuar se çështja kundër tij binte ndesh me një vendim të Gjykatës së Lartë mbi imunitetin presidencial.
Në korrik, gjykata e lartë e vendit vendosi se presidentët kanë imunitet të gjerë nga ndjekja penale për “veprimet zyrtare” që ata ndërmarrin gjatë kohës që janë në detyrë.
Megjithatë, muajin e kaluar, Justice Merchan vendosi që dënimi i Trump për çështjen e pagesave për të heshtur ishte i vlefshëm.
Trump aktualisht pritet të jetë personi i parë i dënuar që do të shërbejë në Shtëpinë e Bardhë.
Ai mund të përpiqet të ankohet kundër dënimit pas dhënies së dënimit.
