Të paktën tre të vdekur në një aksident autobusi në Norvegji

Të paktën tre persona kanë humbur jetën në një aksident autobusi në Norvegji.

Aksidenti ndodhi në distriktin Hadsel në bregun veriperëndimor të vendit, shkruan bbc.

Autobusi doli nga rruga dhe përfundoi pjesërisht në liqenin Åsvatnet, thanë autoritetet në një deklaratë për shtyp.

Mendohet se në momentin e përplasjes ndodheshin 58 persona – shumë prej të cilëve, sipas policisë, janë shtetas të huaj. Përveç viktimave, policia tha se katër persona ishin lënduar rëndë.

Tre persona janë dërguar në spitalin Stokmarknes me helikopter shpëtimi, ndërsa pasagjerët e tjerë janë dërguar në një shkollë aty pranë.

Në vendngjarje kanë punuar edhe ekipet e zjarrfikëses, ambulanca dhe policia.

Në këtë zonë ka pasur raportime për reshje të dendura dëbore dhe erëra të forta, të cilat i kanë vështirësuar përpjekjet e shpëtimit.

Ndryshe, autobusi raportohet se po udhëtonte nga qyteti Narvik për në arkipelagun Lofoten. /Telegrafi/