Ministri finlandez thotë se Rusia do të mbetet kërcënim për Evropën edhe pas përfundimit të luftës në Ukrainë
Rusia dhe vendet që e mbështesin atë do të mbeten një rrezik për Evropën edhe pas përfundimit të luftës në Ukrainë, tha të enjten ministri finlandez i Mbrojtjes, Antti Hakkanen.
Finlanda, si Ukraina, është një fqinj me Rusinë, me një kufi prej më shumë se 1300 kilometra që aktualisht është i mbyllur për të gjithë udhëtarët, pasi Helsinki akuzon Moskën për kanalizimin e migracionit të paligjshëm në Evropë.
Hakkanen, duke paraqitur një përmbledhje të ushtrisë së vendit nordik, tha se e sheh rritjen e bashkëpunimit të Rusisë me Korenë e Veriut, Iranin dhe Kinën si një rrezik afatgjatë.
“Rusia, së bashku me aleatët e saj, do të mbetet një aktor i rrezikshëm në Evropë edhe pas luftës në Ukrainë dhe ne nuk mund të përjashtojmë mundësinë që ata të kërcënojnë vendet evropiane me përdorimin e forcës ushtarake”, tha ai.
Finlanda publikoi të enjten rishikimin e saj të parë të politikës së mbrojtjes, që kur u bashkua me aleancën ushtarake të NATO-s vitin e kaluar në një ndryshim historik të politikës së shkaktuar nga pushtimi i Ukrainës.
Rishikimi rekomandoi që Finlanda duhet të fokusohet në forcimin e mbrojtjes së saj kombëtare, bashkëpunimin me aleatët individualë, veçanërisht në mbikëqyrjen dhe trajnimin rajonal.
“Aleatët kryesorë në bashkëpunimin tonë ndërkombëtar janë Suedia, Norvegjia, Shtetet e Bashkuara, Britania dhe Estonia”, tha Hakkanen, duke shtuar se Finlanda po punonte me Korenë e Jugut, Izraelin dhe Japoninë në sigurimin e materialeve të mbrojtjes.
Finlanda do të vazhdojë të shpenzojë të paktën 2 për qind të prodhimit të brendshëm bruto për mbrojtjen, në përputhje me objektivin minimal të vendosur nga NATO.
Vendet baltike dhe Polonia pritet të shpenzojnë midis 3.2 dhe 4.7 për qind, ndërsa Suedia dhe Norvegjia pritet të arrijnë 2.6 për qind deri në vitin 2030, thuhet në rishikimin e politikave.
Hakkanen në fillim të kësaj jave i tha Reuters, se Finlanda do të konsiderojë kthimin e minave tokësore kundër personelit për të ndihmuar në mbrojtjen e kufirit, gjë që do të nënkuptonte tërheqjen nga një traktat i ratifikuar ose aderuar nga më shumë se 160 vende, por jo nga Rusia. /Telegrafi/
