Kryeministri francez kaloi projekligjin pa zhvilluar një votim, opozita kërkon mocion mosbesimi
Kryeministri francez, Michel Barnier, kaloi një projektligj buxheti në dhomën e poshtme të Parlamentit të Francës të hënën, pa zhvilluar një votim, një hap i rrezikshëm që mund të çojë në një mocion mosbesimi këtë javë dhe mund të rrëzojë qeverinë.
Ky zhvillim ka shkaktuar shqetësime të mëdha në tregjet financiare, duke rritur ndjeshëm kostot e huamarrjes së Francës dhe ka thelluar pasigurinë që ka përfshirë vendin pas zgjedhjeve të parakohshme të verës së kaluar, të cilat nuk dhanë një shumicë të qartë parlamentare.
Lëvizja e Barnier, që ka shkaktuar një reagim të ashpër nga partitë e majta dhe nga Partia Kombëtare e ekstremit të djathtë e Marine Le Pen, e ka vënë qeverinë franceze përpara një kërcënimi të mundshëm të rrëzimit.
Partitë e majta dhe Le Pen kanë njoftuar se do të paraqesin mocione mosbesimi, me një votim të mundshëm që mund të zhvillohet siç pritet deri të mërkurën, shkruan The New York Times, përcjell Klankosova.tv.
Në një përpjekje për të shpjeguar lëvizjen e tij, Barnier tha: “Nuk mendoj se francezët do të na falnin nëse ne do të vënim interesat individuale përpara të ardhmes së kombit.”
Presidenti Emmanuel Macron do të mbetet në post, por nëse qeveria bie, ai do të duhet të emërojë një kryeministër të ri.
E gjithë kjo pasiguri ka krijuar një atmosferë ankthi të thellë, dhe analistët politikë e shohin këtë situatë si pasojë të ndarjes së thellë politike që ka lënë parlamentin pa një shumicë të qartë pas zgjedhjeve të parakohshme të verës së kaluar.
Kjo ka çuar në një bllokim politik në Dhomën e Ulët të Parlamentit, ku asnjë parti ose bllok nuk ka arritur shumicën absolute.
Buxheti është testi i parë kryesor i qeverisë, dhe pasiguria politike dhe kërcënimet për rritjen e borxhit të Francës e kanë bërë këtë proces edhe më të ndërlikuar.
Barnier ka përdorur nenin 49.3 të Kushtetutës për të kaluar projektligjin për shpenzimet e sigurimeve sociale, duke detyruar një proces të shpejtë që mund të çojë në një numër të shtuar të mocioneve mosbesimi në ditët e ardhshme.
