Shefi i policisë arrestohet për bashkëpunim me narkodilerë në Spanjë, i gjenden 20 milionë euro të fshehura në mur

Policia e Brendshme e Policisë Kombëtare në Spanjë ka arrestuar shefin e Seksionit të Krimeve Ekonomike dhe Pastrimit të Parave, Oscar Sanchez Gil, dhe gruan e tij për lidhje të mundshme me një organizatë të fuqishme narkotikësh, e cila u shkatërrua së fundmi nga agjentët.

Autoritetet zbuluan 20 milionë euro të fshehura në një mur në shtëpinë e Sanchez Gil në Alcala de Henares dhe një tjetër milion euro në zyrën e tij në polici, raporton Elmundo.es.

Sanchez Gil, i cili është akuzuar për pastrim parash dhe ryshfet, ka qenë një figurë e respektuar në Policinë Kombëtare dhe ka udhëhequr hetime të rëndësishme.

Hetimet përfshinë gjithashtu gruan e tij, e cila punon në komisariatin e Alcala de Henares. Të dy janë dërguar në burg pas paraqitjes së tyre para gjykatës.

Hetimet filluan pas dyshimeve se Sanchez Gil mund të kishte lidhje me grupe narkotikësh dhe përfshiu ndërhyrjen e Agjencisë së Tatimeve dhe Policisë Kombëtare.

Arrestimi ndodhi pas kapjes së një nga ngarkesave më të mëdha të kokainës në histori, më 6 nëntor, në portin e Algeciras, ku u kapën 13.062 kg kokainë.

Ky operacion ka zbuluar gjithashtu lidhjet mes policëve dhe bandave të narkotikëve, duke zbuluar përmasat e mëdha të parave që mund të kontrollohen nga këto grupe kriminale.