Sri Lanka dënon fuqishëm Izraelin për sulmet që plagosën dy prej paqeruajtësve të saj në Liban
Ministria e Jashtme e Sri Lankës tha se “dënon fuqishëm” sulmin e Izraelit ndaj paqeruajtësve të OKB-së në Liban që plagosi dy ushtarë të saj të premten.
Paqeruajtësit u plagosën nga një sulm në selinë e Forcave të Përkohshme të Kombeve të Bashkuara në Liban (UNIFIL) në qytetin jugor të Naqoura, tha në një deklaratë ministria e jashtme e Sri Lankës.
Të premten, Forcat Mbrojtëse të Izraelit pranuan se goditën një bazë UNIFIL dhe thanë se po shqyrtonin rrethanat rreth incidentit.
Shefi i paqeruajtësve të OKB-së, Jean-Pierre Lacroix tha të enjten se situata në Libanin jugor është “gjithnjë e më alarmante”, me paqeruajtësit e OKB-së “në rrezik serioz”.
Kreu i forcave të armatosura të Irlandës, gjenerallejtënant Sean Clancy, tha më herët se zjarri izraelit që goditi pozicionin paqeruajtës të OKB-së në Libanin jugor të premten dukej “i qëllimshëm”, duke pasur parasysh rrethanat.
Ky është incidenti i dytë i zjarrit të tankeve izraelite që rezulton me lëndime të paqeruajtësve të OKB-së në Libanin jugor këtë javë. Dy paqeruajtës indonezianë u shtruan në spital të enjten pas një incidenti të ngjashëm, shkruan CNN, transmeton Klankosova.tv.
