Reuters: Izraeli vendosi eksploziv brenda 5000 pejxherëve të Hezbollahut

Agjencia izraelite e spiunazhit Mossad vendosi eksplozivë brenda 5000 pejxherëve të importuar nga grupi libanez Hezbollah muaj përpara shpërthimeve të së martës.

Kështu i tha Reuters-it një burim i lartë sigurie libanez dhe një burim tjetër, transmeton Klankosova.

Operacioni ishte një shkelje e paprecedentë e sigurisë e Hezbollahut që shkaktoi mijëra pagera të shpërthyer në të gjithë Libanin, duke vrarë nëntë njerëz dhe duke plagosur rreth 3.000 të tjerë, duke përfshirë luftëtarët e grupit dhe të dërguarin e Iranit në Bejrut.

Burimi libanez i sigurisë tha se pejxherët ishin nga Gold Apollo me bazë në Tajvan, por kompania tha në një deklaratë se nuk i prodhonte pajisjet. Ai tha se ato ishin bërë nga një kompani e quajtur BAC, e cila ka një licencë për të përdorur markën e saj, por nuk dha më shumë detaje.

Hezbollahu, i mbështetur nga Irani, është zotuar të hakmerret kundër Izraelit, ushtria e të cilit nuk pranoi të komentojë mbi shpërthimet.

Hezbollahu tha në një deklaratë të mërkurën se “rezistenca do të vazhdojë sot, si çdo ditë tjetër, operacionet e saj për të mbështetur Gazën, popullin e saj dhe rezistencën e saj, e cila është një rrugë e veçantë nga dënimi i ashpër që armiku kriminal (Izraeli) duhet të presë në përgjigje ndaj masakrës së së martës”.

Komploti duket se ka qenë shumë muaj në përgatitje, i thanë Reuters-it disa burime, transmeton Klankosova.tv.

Burimi i lartë libanez i sigurisë tha se grupi kishte porositur 5000 paijisje nga Gold Apollo, të cilat disa burime thonë se u sollën në vend në fillim të këtij viti.

Themeluesi i Gold Apollo, Hsu Ching-Kuang tha se pejxherët e përdorur në shpërthim ishin bërë nga një kompani në Evropë që kishte të drejtën të përdorte markën e firmës, emrin e së cilës ai nuk mund ta konfirmonte menjëherë. Kompania në një deklaratë emëroi BAC si firmë, por Hsu nuk pranoi të komentojë vendndodhjen e saj.

“Produkti nuk ishte yni. Vetëm se kishte markën tonë në të”, u tha Hsu gazetarëve në zyrat e kompanisë në qytetin verior tajvanez të New Taipei të mërkurën.

Burimi i lartë libanez i sigurisë identifikoi një fotografi të modelit të pejxherit, një AP924, i cili si pejxherët e tjerë merr me valë dhe shfaq mesazhe me tekst, por nuk mund të bëjë thirrje telefonike.

Gold Apollo tha në një deklaratë se modeli AR-924 ishte prodhuar dhe shitur nga BAC-i.