Jep dorëheqje komisionari evropian, fajëson qeverinë e diskutueshme të Von der Leyenit

Thierry Breton ka dhënë dorëheqje si komisionar evropian, duke ua dhënë një goditje të re përpjekjeve të Ursula von der Leyenit për të ndërtuar ekipin e saj të ardhshëm.

Bëhet e ditur se Bretoni dha dorëheqje duke pretenduar se Von der Leyeni i kishte bërë presion Francës, vendit të tij, të propozonte një tjetër kandidat për ta zëvendësuar atë “për arsye personale”.

Bretoni e njoftoi lëvizjen në një letër të publikuar në X, duke thënë se ai u bë i vetëdijshëm për këtë lobim të supozuar “disa ditë më parë”.

Bëhet e ditur se francezi pritej të merrte një rol të rëndësishëm në Komisionin e ardhshëm, pasi u përfol për një zëvendëspresident ekzekutiv.

Por në letrën e tij, ai pretendon se Parisit iu premtua një pozicion edhe më i lartë në këmbim të heqjes dorë nga oferta e tij.

“Disa ditë më parë, në pjesën e fundit të negociatave për përbërjen e së ardhmes, ju i kërkuat Francës të tërheqë emrin tim – për arsye personale që në asnjë rast nuk e keni diskutuar drejtpërdrejt me mua – dhe ofruat, si shkëmbim politik, një rol gjoja më me ndikim për Francën”, shkruan Bretoni.

“Tani do t’ju propozohet një kandidat tjetër”, shtoi ai.

Bretoni më pas thotë se ishte “nder” që kishte punuar pesë vitet e fundit si Komisioner për tregun e brendshëm “mbi interesat kombëtare dhe partiake”, shkruan euronews, përcjell Telegrafi.

“Megjithatë, në dritën e këtyre zhvillimeve – dëshmi e mëtejshme e qeverisjes së dyshimtë – kam arritur në përfundimin se nuk mund të ushtroj më detyrat e mia”, vazhdoi Bretoni.

“Prandaj po jap dorëheqje nga pozicioni im si Komisioner Evropian”, përfundoi ai.