Gjermania dhe Holanda, thirrje qytetarëve të tyre të largohen nga Libani

Gjermania dhe Holanda u kanë kërkuar qytetarëve të tyre të largohen nga Libani, pasi Kanadaja lëshoi një paralajmërim të ngjashëm në dritën e përshkallëzimit të tensioneve midis Izraelit dhe grupit Hezbollah.

Në një paralajmërim të përditësuar të udhëtimit në faqen e saj të internetit, Ministria e Jashtme gjermane paralajmëron se “situata e sigurisë në rajon është shumë e paqëndrueshme”, pasi përleshjet përgjatë kufirit Izrael-Liban janë intensifikuar javët e fundit, shkruajnë mediat e huaja, përcjell Telegrafi.

“Nuk mund të përjashtohet një përshkallëzimi i mëtejshëm i situatës dhe zgjerimi i konfliktit”, vijon paralajmërimi i udhëtimit. “Kjo vlen veçanërisht për pjesët jugore të Libanit, duke përfshirë zonat urbane jugore të Bejrutit si dhe Luginën Bekaa, duke përfshirë rrethin Baalbek-Hermel”.

“Një përshkallëzim i mëtejshëm mund të çojë gjithashtu në një pezullim të plotë të trafikut ajror nga aeroporti Rafik Hariri. Largimi nga Libani me aeroplan atëherë nuk do të ishte më i mundur”.

Paralajmërimi i përditësuar i udhëtimit është lëshuar në mes të një vizite të ministres së Jashtme gjermane Annalena Baerbock në rajon.

Ashtu si Gjermania, Holanda përsërit thirrjen e saj për qytetarët që të largohen nga Libani, nëse ata kanë zgjedhur të qëndrojnë atje pas paralajmërimeve të mëparshme.

“Ministria e Jashtme përsërit thirrjen urgjente për të mos udhëtuar në Liban”, shkruan ministria në X, dikur Twitter. “A jeni akoma aty? Largohuni nga vendi ndërsa ka [ende] fluturime komerciale”.