Julian Assange është kthyer në shtëpi, në Australi
Themeluesi i WikiLeaks, Julian Assange, është kthyer në shtëpi në Australi, i lirë për herë të parë pas 12 vjetësh, pasi një gjykatës amerikan nënshkroi marrëveshjen e tij të papritur për pranimin e fajësisë.
Brohoritjet shpërthyen nga mbështetësit e mbledhur në aeroportin e Canberra në kryeqytetin australian, ndërsa Assange zbarkoi me avionin privat.
Teksa iu afrua terminalit, gruaja e tij Stella doli me një buzëqeshje të gjerë në fytyrë. Assange e tërhoqi atë në përqafim, duke e ngritur nga dyshemeja para se dyshja të putheshin.
“Juliani donte që unë t'i falënderoja sinqerisht të gjithë. Ai donte të ishte këtu. Por ju duhet të kuptoni se çfarë ka kaluar. Ai ka nevojë për kohë, duhet të rikuperohet dhe ky është një proces”, tha ajo në një konferencë për shtyp pas mbërritjes së bashkëshortit të saj, njofton CNN, transmeton rtk.
Me lot në sy, Stella bëri disa pauza të shkurtra në një përpjekje të dukshme për të mbledhur emocionet e saj teksa foli me gazetarët.
“Të lutem, të na japësh hapësirë, të na japësh privatësi, të gjejmë vendin tonë, ta lëmë familjen tonë të jetë një familje përpara se ai të mund të flasë përsëri në një kohë të zgjedhjes së tij”, shtoi ajo.
