Mbi 20.000 fëmijë të varrosur, të bllokuar, të ndaluar dhe të humbur mes luftës në Gazë
Gati 21.000 fëmijë janë të zhdukur në Gazë, ka pohuar grupi britanik i ndihmës “Save the Children”.
Në një raport të botuar të hënën, grupi tha se mijëra fëmijë palestinezë të zhdukur besohet të jenë të bllokuar nën rrënoja, të varrosur në varre pa shenja, të dëmtuara nga eksplozivët, të ndaluar nga forcat izraelite ose të humbur në kaosin e konfliktit.
“Është pothuajse e pamundur të mblidhet dhe verifikohet informacioni në kushtet aktuale në Gazë”, ka thënë grupi, “por të paktën 17.000 fëmijë besohet të jenë të pashoqëruar dhe të ndarë dhe rreth 4.000 fëmijë ka të ngjarë të jenë zhdukur nën rrënoja, me një numër të panjohur edhe në varreza masive”.
Izraeli ka vrarë më shumë se 14.000 fëmijë në Gazë që nga 7 tetori, ndërsa të tjerët vuajnë nga kequshqyerja e rëndë dhe “nuk kanë as energji për të qarë”, tha Fondi i Kombeve të Bashkuara për Fëmijët (UNICEF), në një raport në fillim të këtij viti, shkruan Al Jazeera, përcjell Telegrafi.
“Që nga tetori, Gaza është përballur me dhunë të pamëshirshme e cila ka vrarë mbi 37,000 njerëz, duke përfshirë mijëra fëmijë. Ai vjen pas një sulmi në Izrael nga grupet e armatosura palestineze që vranë mbi një mijë njerëz, duke përfshirë të paktën 33 fëmijë”, thuhet në raportin e "Save the Children".
Ai gjithashtu thekson se rreth 250 fëmijë palestinezë janë gjithashtu të zhdukur në Bregun Perëndimor të pushtuar, që nga 9 qershori.
Jeremy Stoner, drejtori rajonal i "Save the Children" për Lindjen e Mesme, ka bërë thirrje për një hetim të pavarur mbi situatën rreth fëmijëve të zhdukur të Gazës dhe për përgjegjësi.
Ndërsa Khaled Quzmar, drejtori i përgjithshëm i organizatës për të drejtat e fëmijëve Defense for Children International Palestine, i tha "Al Jazeera"-s se ndikimi që ata kanë dëshmuar në konfliktin në Gaz[ është në një nivel të paparë më parë, madje edhe gjatë Luftës së Dytë Botërore.
“Është një luftë kundër fëmijëve. Fëmijët në Gaz[ janë kostoja e madhe e gjenocidit izraelit në Gaz[”, ka theksuar Quzmari
Kritikat ndërkombëtare janë shtuar mes numrit në rritje të vdekjeve në luftë, si dhe krizës humanitare në përkeqësim.
Megjithatë, të dielën, kryeministri izraelit Benjamin Netanyahu përsëriti se ai nuk do të pajtohej me asnjë marrëveshje që përcaktonte fundin e luftës së Izraelit në Gaz[.
