Dodik: Republika Serbe do të mbajë referendum për pavarësi nga Bosnjë dhe Hercegovina

“Republika Serbe do të mbajë një referendum për pavarësimin nga Bosnjë dhe Hercegovina dhe data do të caktohet në përputhje me interesat e partive të tjera”, ka thënë për agjencinë ruse TASS kryetari i entitetit serb të BeH, Millorad Dodik.

“Ekziston vendimi për ndarje, por ende nuk është caktuar data konkrete. Duhet bërë shumë analiza. Ne do të donim tash, mirëpo, përveç nesh, janë edhe dy palë të tjera në proces. Kjo, natyrisht, kërkon kohë”, ka thënë Dodiku në një intervistë për TASS në margjinat e Forumit Ekonomik Ndërkombëtar në Shën Petersburg, transmeton Paparaci.

“Ne jemi të sigurt se në këtë fazë tashmë ka mjaft pjekuri të përgjithshme historike, civilizuese dhe mirëkuptim se kjo duhet dhe do të ndodhë”, ka pretenduar Dodiku.

Sipas tij, qëndrimi i Republikës Serbe brenda Bosnjë e Hercegovinës është “sinonim i humbjes së kohës dhe mundësive”.

“Kjo është arsyeja pse është e nevojshme që të realizojmë atë që duam sa më shpejt që të jetë e mundur, në mënyrë që të ndalojmë shpenzimin e burimeve duke shpresuar se Bosnja dhe Hercegovina do të bëjnë diçka”, ka shtuar kryetari i RS-së.

Në të njëjtën kohë, ai pretendon se RS-ja “absolutisht nuk dëshiron të krijojë paqëndrueshmëri”.

“Prandaj ne para së gjithash i propozuam Bosnjë dhe Hercegovinës që të tërhiqet nga vendi ynë, të shfuqizojë Marrëveshjen e Dejtonit. Ne në fakt po shkojmë në këtë drejtim”, ka thënë ai.

Dodiku më herët ka thënë se organet e Republikës Serbe do të përgatisin një rezolutë për shkëputjen paqësore të këtij entiteti nga Bosnjë dhe Hercegovina brenda 30 ditëve. Sipas fjalëve të tij, kjo do të sigurojë ruajtjen e modelit ekzistues të funksionimit të ekonomisë dhe përshtatjen e tij me modelin e ndarjes paqësore brenda pak vitesh.

Lideri i Republika Serbe e lidhi këtë iniciativë me projektrezolutën e Asamblesë së Përgjithshme të OKB-së mbi gjenocidin në Srebrenicë në 1995, të cilin Dodiku e quajti “të paligjshme”. Ai gjithashtu ka thënë se “komuniteti ndërkombëtar nuk po i kushton vëmendje vrasjes së rreth 3.500 serbëve etnikë, viktima të milicive islamike në zonën e Srebrenicës gjatë konfliktit të armatosur në fillim të viteve 1990”, raporton agjencia ruse e lajmeve TASS.